الدولار يتراجع في نهاية 2024.. "نبوءة فيتش" عن مستقبل سعر الصرف فى مصر
يا ترى سعر الدولارفى مصر رايح على فين ؟وايه مصير العملة الأمريكية من دلوقتى ولحد آخر 2024 ؟ وايه السيناريوهات المنتظرة فى التعامل مع التضخم ؟ وايه تأثير اللى بيحصل فى المنطقة على أزمة نقص العملة؟ وليه تحويلات المصريين فى الخارج رجعت ترتفع تاني؟
وكالة "فيتش" للتصنيف الائتماني اللى بتعتبر واحدة من بين 3وكالات تصنيف عالمية مهمة طلعت فى الساعات الأخيرة تقرير عن مستقبل سعر صرف الدولارفى مصر أكدت فيه ان العملة الأمريكية هتشهد انخفاض من دلوقتى لآخر 2024 بين مستويات 47.9 و49.5 جنيه.
وفى الوقت اللى شهد فيه سعر الجنيه المصري بعض التقلبات أمام الدولار خلال الشهر اللى فات قدّرت "فيتش" حجم تخارج الأجانب من أذون الخزانة المصرية بحوالى 2 مليار دولار خلال الأسبوع الأول من أغسطس .. رغم بعض التقارير المضروبة اللى طلعت وقتها وقالت ان الاموال الساخنة اللى خرجت أكبرمن الرقم ده بكتير
ورغم التفاؤل الكبير اللى كشف عنه تقرير فيتش عن مستقبل الجنية الا أنه حذر من ان استمرار الحرب في غزة لغاية آخر 2024 2024 ممكن تخلى العملة المصرية تحت الضغط لبقية العام وتحد من مساحة تعزيز قوتها.
سيناريوهات فيتش عن مستقبل سعر الصرف بتحمل مخاوف من المخاطر الجيوسياسية، خصوصا لو استمرت الحرب إلى ما بعد نهاية العام الجاري وبالتالي التأثير على معامل المخاطر للمنطقة وتدفقات الشحن العالمي عبر قناة السويس واستمرار خسارة جزء كبير من عائدات الخدمات بالاضافة كمان لاحتمالية اتساع دائرة الحرب بين إسرائيل ولبنان وإيران.
طب تقرير فيتش قال ايه عن تحويلات المصريين فى الخارج وزيادة التدفقات الدولارية؟
التقرير ركزعلى أهمية تحويلات المغتربين وكشف ارتفاع تحويلات المصريين العاملين بالخارج 31% على أساس سنوي خلال العام المالي الجاري ووصولها إلى 28.9 مليار دولار لتمثل 9.1% من الناتج المحلي الإجمالي.. وقال ان الارتفاع هيستمر ويتضاعف بفضل آفاق النمو القوية لدول مجلس التعاون الخليجي اللى بيشتغل فيها عدد كبير من المغتربين المصريين.
وطبعا الزيادة فى التحويلات هتنعكسبصورة ايجابية قوية على سوق صرف العملات الأجنبية ومعاها هينخفض سعر الدولار.
وأثنى تقرير الوكالة الدولية على جهود مصر في تنويع مصادر السياحة وقال ان ده هيرفع إيراداتها المتوقعة خلال العام المالي الجاري إلى 15.1 مليار دولار بنمو 5%، خصوصا مع تزايد أعداد السياح الروس من جديد.. بجانب انتعاش إيرادات قناة السويس حال العودة للوضع الطبيعي مع انتهاء الحرب في غزة.
طب والتضخم رايح على فين وهل هيتم تخفيض الفايدة قريب؟
تقرير فيتش قال انه مع انحسار التضخم إلى أقل من 20% بحلول فبراير 2025 هيبدأ المركزي في دورة تخفيف السياسة النقدية إما قبل فبراير أو بعده مباشرة ووفقا لتوقعات خبراء الوكالة فيه مجال ان البنك المركزي المصري يخفض الفائدة بمقدار 1200 نقطة أساس في عام 2025 .. يعنى الفايدة ممكن تنزل12% خلال السنة الجاية
