لو بتفكر تجيب شقة تمويل عقاري.. شوف أفضل 3 بنوك يشتروهالك

لو عايز تشتري شقة بنظام التمويل العقاري ومش عارف يعني اية تمويل عقاري واية الفلوس المطلوبة منك كل شهر يبقي الفيديو ده ليك.. هنقولك علي تفاصيل التمويل العقاري.. واية يا مميزاته واجراءات الحصول عليه

الارتفاعات الكبيرة اللي حصلت في اسواق العقارات والأرقام اللي وصلت لها اسعار الشقق واللي خلت الأغلبية العظمي من الشعب المصري عاجز عن شرا شقة يسكن فيها هو واسرته، علشان تشتري شقة في اي منطقة معقولة في الايام دي فانت بالميت كده محتاج اكثر من مليون أو ميلون ونصف.

وبسبب اللي حصل ده في اسعار العقارات والأرقام الكبيرة اللي حصلت لها اسعار الشقق، فالبنوك طرحت نظام التمويل العقاري خصوصا أنه بيساعد الناس أنهم يقدروا يشتروا شقق سكنية وبيكون السداد على فترات طويلة، وكمان في مميزات كتيرة بتختلف من بنك للتاني من حيث الأقساط والفوايد والرقم الأجمالي اللي هيدفعه كل مواطن علشان يحصل علي وحدة سكنية واللي طبعا بيختلف من بنك للتاني ومن شق للتانية .
طيب ايه هيا اهم البنوك اللي طرحت وأعلنت عن برامج التمويل العقاري لشراء الشقق السكنية؟.
في اكتر من بنك طرح ودخل في مباراة التمويل العقاري، واحد من البنوك دي هو البنك الأهلي المصري واللي طرح برامج للتمويل العقاري بفترات سداد بتوصل لـ 20 سنة، وبسعر فايدة بيتراوح ما بين 5% و7% بشكل متناقص، وبتوصل مدة العمل لـ 6 شهور للموظفين بالقطاع الخاص والحكومي وبتوصل لـ12  شهر لأصحاب الاعمال والمهن الحرة.

الدفعة المقدمة للتمويل العقاري من البنك الأهلي بتوصل لـ 20% كحد أدني، من إجمالى سعر الوحدة وبحد أقصى 50%، وبتوصل قيمة التمويل ل %80 من إجمالي سعر الوحدة وكمان البنك بتيك للعملاء امكانية فتح حساب والاستعلام الائتماني بشكل مجاني .
تاني بنك معانا النهاردة من البنوك اللي طرحت برامج مميزة للتمويل العقاري هو بنك مصر، واللي طرح برامج تمويل عقاري بتوصل لـ5 مليون جنيه وبفترة سداد بتوصل لـ 240 شهر، وحدد كمان المستندات المطلوبة من العملاء للحصول علي التمويل وهيا بيان دخل شهري للعميل، وصورة بطاقة رقم قومي وإيصال مرافق حديث.
بنك مصر أعلن كمان عن قيامه بالتأمين على حياة العملاء مجاناً، وكمان عطي الأمكانية لمنح القرض للزوج والزوجة في حالة لو كانت الزوجة شغالة، وكمان ممكن العميل ياخذ القرض بضمان وحدة سكنية تانية بشرط أنها تكون مسجلة في الشهر العقاري وكمان بيتم إعفاء العميل من مصاريف فتح الحساب والدمغة النسبية ومصاريف الاستعلام الائتماني.
تالت بنك معانا النهاردة من البنوك اللي اعلنت عن برامج التمويل العقاري هو بنك التعمير والإسكان واللي طرح برامج للتمويل العقاري بسعر فايدة 10% متناقصة، وكمان حدد فترة سداد القرض على فترة 20 سنة، واشترط أن الحد الأقصى للدخل الشهري للعميل 40 ألف جنيه، والحد الأقصى للأسرة بالنسبة للدخل الشهري 50 ألف جنيه، ويكون الحد الاقصي لسعر الوحدة اللي العميل عايز يشتريها ميزدتش عن  2 مليون و250 ألف جنيه.