تلال الدهب.. إيه حكاية الخزن المصفحة في البنوك

 
 
ايه اللي بيحصل في البنوك المصرية وايه حكاية تلال الدهب اللي في الخزن وازاي المصريين بقي خبراء في الاقتصاد وعملوا حساب كل حاجة.. هنقولك على التفاصيل كلها في الفيديو ده خليكم معانا للآخر 
 

في الشهور الأخيرة المصريين بقي عندهم وعي اقتصادي كبير وعرفوا كتير عن قواعد السوق والاستثمار الصح وعشان كده مصريين كتير جدا حولوا مدخراتهم وفلوسهم الزايدة لدهب وشالوها في خزن مصفحة وآمنة بالبنوك ونتيجة لده تقريبا الخزن دي بقت شبه محجوزة للعملاء في البنوك في ظاهرة بتحصل لأول مرة من ناحية الإقبال على حجز الخزن اللي في البنوك ودي عبارة عن خزن مصفحة وآمنة وفي ضمان البنك ومؤمنة بشكل كامل وبيروح العميل بيستأجر الخزنة وبيحط فيها تحويشة العمر أو دهب أو فلوس ومقتنيات ثمينة أو أوراق مهمة ودي خدمة قديمة بتقدمها البنوك للعملاء والخدمة بتكون نظير رسوم معروفة ومش بتكون عالية اووي والناس بتفضل خزن البنوك عشان أمان لمقتنياتهم الثمينة.

حسب المعلومات الإقبال على حجز خزائن البنوك الشخصية زاد بعد أزمة نقص الدولار وهبوط قيمة الجنيه ودخول كميات كبيرة من الدهب واللي وصلت لأكتر من 4 طن دهب مع المصريين بالخارج ضمن مبادرة دخول الدهب من غير جمارك، طبعا اي مخزون الدهب في مصر سواء للأفراد أو اللي موجود في البنك المركزي المصري بيعتبر احتياطي استراتيجي من النقد لأن الدهب بيعتبر نقد وفلوس.

وحسب المعلومات بردو  دلوقتي فيه ضغط كبير على الطلب على تأجير الخزاين الحديدية ببعض البنوك  ودا دفع بعض الإدارات التنفيذية لتعديل سياساتها تجاه الخزن وربط تأجيرها بكبار العملاء بسبب محدودية عددها وارتفاع تكلفتها التأمينية، وكمان حركة الحساب خلال آخر السنة وفيه بنوك تانية قررت زيادة عدد مساحات الخزن في مقدارها لتلبية الطلب المتزايد عليها.

 طيب ليه المصريين اختاروا الدهب تحديدا عشان يخزنوه؟..
شوف حضرتك الدهب هو افضل استثمار الفلوس لما تكون فيه أزمة أو لما سعر العملة بتاعتك ينزل لأن الدهب قيمته بتزيد على طول مع الزمن وبالتالي اي حد حول فلوسه لدهب ضامن أن قيمتها هتزيد مش هتقل على عكس لو فضلت فلوس سايلة من غير استثمار وكمان توقعات السوق بتقول إن الدهب طالع خلال الشهور الجاية ومش هينزل قبل 2026 يعني كل ما تشتري دهب دلوقتي كل ما فلوسك ما هتزيد بشكل كبير وعشان كده كان فيه اقبال كبير على تأجير خزن البنوك في مصر  اليومين دول.

والدهب ميزته كاستثمار أنه مش بياخد مساحة ولا بيحتاج مجهود كبير من الشخص على عكس الاستثمار مثلا في المشروعات أو العقارات أو البورصة واللي بتحتاج معرفة واعصاب في الاستثمار وخبرة .