أسبوع السعد على الجنيه المصري.. ليلة هزيمة الدولار

ايه اللي هيحصل مع استمرار انخفاض أسعار الدولار أمام الجنيه المصري وازاي الاسواق هتتجاوب مع الأسواق والأسعار.. وهل هيستمر الدولار في الهبوط.. كله دا هنعرفه في التقرير دا خليكم معانا للاخر
 

الدولار هبط من 48.85 جنيه يوم الخميس اللي قبل اللي فات وهبط على مدار اسبوع كامل وقفلت تداولات البنوك امبارح الخميس عند 48.57 جنيه يعني فقد حوالي 30 قرش من قيمته وهي نفس القيمة اللي زادها الجنيه المصري.. هبوط الدولار مش انجاز في حد ذاته لأن دا الطبيعي إن سعر العملة ينزل ويزيد ودا حسب قانون العرض والطلب والسعر الحر لتداول العملات لكن الأهم إن الدولار أخد وتيرة طويلة في النزول واللي استمرت على مدار أسبوع تداول كامل في البنوك ودي محصلتش من ساعة قرار التعويم في مارس اللي فات.

طيب دا معناه إيه؟
أكيد معناه بحسب قوانين السوق إن المعروض من الدولار كبير بالشكل اللي بيلبي الطلب عليه وفي نفس الوقت بيأكد إن التدفقات النقدية الأجنبية مستمرة بشكل قوي دا بالاضافة إن سوق الصرف بتتأثر ببقية الأخبار الايجابية في بقية القطاعات الاقتصادية زي أخبار عن صفقات جديدة أو هبوط فاتورة الاستيراد مثلا أو زيادة الصادرات وتحويلات المصريين بالخارج وقرب انتهاء أزمات المنطقة  وحالة التفاؤل الكبيرة من صندوق النقد الدولي بخصوص الاقتصاد المصري وخاصة توقعاته باستمرار زيادة الاحتياطي النقدي في البنك المركزي على مدار الشهور الجاية وتخطه حاجز الـ48 مليار دولار وفي نفس الوقت توقعاته بقفزة في التدفقات الاستثمارية ودا غير إن مصر هتعبر عنق الزجاجة في ملف الديون الخارجية لأن سنة 2024 هي أكتر سنة مصر هتسدد فيها قروض وفوايد وبعدها الاقساط هتبدأ تخف وتتباعد في فتراتها الزمنية.

كل اللي قلناه دا وغيره من المؤشرات القوية بيقول إن الدولار مستمر في الهبوط الايام الجاية ودا اكيد هيدي قوة جديدة للجنيه وفي نفس الوقت هينشر الاستقرار في الاسواق والمفترض إن أسعار السلع تنزل كمان في الاسواق مع هبوط العملة الامريكية وهي العملة الاساسية في الاستيراد من الخارج ودا معناه تكلفة الاستيراد هتقل والسعر النهائي هينزل.
هبوط الدولار المستمر هيقطع الطريق أمام اي محاولة لاستعادة حالة الفوضى اللي كانت موجودة في سوق الصرف وهيقضي على اي أكاذيب بتقول إن الاقتصاد المري بيعاني من أزمات في وقت كل المؤشرات بتقول إنه عدى مرحلة الخطر من زمان ودلوقتي في منطقة الانطلاق الكبير باستثمارات ضخمة وخطط طموحة في كل الملفات وفي كل شبر على أرض مصر.