إيه الجديد في ملف سيارات المعاقين.. وامتى الحكومة هترجع تستوردها تاني؟
يا ترى إيه الجديد في ملف سيارات المعاقين، بعد قرار الحكومة بوقف استيرادها ومصادرة العربيات من غير المستحقين وتوقيع غرامات عليها كمان.. وامته هترجع نستوردها تاني؟.. هنقولك التفاصيل في التقرير التالي
ناس كتير بتسأل عن عربيات المعاقين وأسباب تنفيذ الحكومة حملات عشان تصادرها في الفترة الأخيرة.
بص يا سيدي، احكاية ببساطة، إن الدكتور مصطفى مدبولي رئيس مجلس الوزراء، أصدر قرار بفحص أوراق سيارات المعاقين؛ ودعه عشان يتأكدوا من سلامة الإجراءات، وأن المعاق بيحصل بنفسه على الدعم المقدم من الدولة ليه، وأن مافيش حد تاني بيستفيد منها غير أصحاب الهمم.
وكلنا شوفنا، إن حوالي 80% من المستفيدين من الدعم المقدم من الحكومة على عربيات المعاقين، بيبقوا تجار بيتلاعبنوا في جوابات العربيات دي عشان يقدروا يحققوا من وراها مكاسب مادية.
لكن الحكومة قفلت الباب ده عليهم، وقررت توقف استيراد سيارات المعاقين.. طب امته هترجع تستوردها تاني لمستحقيها؟
الحكومة قالت إن قرار وقف استيراد سيارات المعاقين مؤقت؛ لحد ما تنتهي المخالفات اللي رصدتها الجهات الرقابية على كتير من العربيات دي.
وقالت كمان إنها رصدت مئات المخالفات في الأوراق المتعلقة بظاهرة التجارة في جوابات عربيات المعاقين، زي إن التجار بيشتروا جوابات تخصيص السيارات للمعاق بمبلغ مالي، وبعدين يستوردوا العربيات دي ويبيعوها وبيحققوا من رواها مكتسب مادية، وبكده يكونوا استفادوا من دعم الدولة على الرغم انهم مايستحقوش الدعم ده.
وكتير متيعرفش إن العربيات دي مدعومة من الدولة برفع قيمة الضريبة الجمركية وكمان ضريبة القيمة المضافة، وبالتالي العربيات المخالفة للإجراءات خاصة عند ثبوت أن المعاق لا يستفيد منها بنفسه، ويستفيد منها شخص تاني من الأسوياء، بيتم التحفظ عليها من اللجان اللي شكلتها الحكومة عشان ترصد المخالفات.
وبع كده، بيتم التعامل مع السيارة على أنها استيراد حر وتحميل الضريبة الجمركية وضريبة القيمة المضافة عليها، وبعد سداد كل ده بيتم رفع الحظر عنها والسماح للمالك بتسلم السيارة من الجمارك.
وكانت وزارة المالية، أصدرت القرار رقم 334 لسنة 2024، واللي مضمونه تشكيل لجان في كافة محافظات الجمهورية لمراجعة السيارات اللي تم الإفراج عنها لصالح ذوي الهمم خلال السنوات الثلاث الماضية.
والقرار ده جه بعد تحذير الحكومة من المخالفات المتعلقة بإساءة استخدام هذه السيارات من قِبل أشخاص لا يعانون من أي إعاقات، وبعد انتهاء المخالفات دي ممكن جدا الحكومة ترجع تستوردها من تاني.
