الخير في البر والبحر.. إزاي مصر هتتحول لغول نفطي في المنطقة
هو ممكن مصر تبقي بلد نفطية غنية جدا زي الخليج وإيه الميزات اللي عندها عشان توصل للمرحلة دي وإيه حكاية الاكتشافاات الجديدة للبترول والغاز.. كل دا هنشرحه لحضراتكم في الفيديو دا.. خليكم معانا للأخر
كل دولة في العالم بترسم اقتصادها بناء على مواردها الطبيعية وثرواتها اللي على أرضها ومياهها الاقليمية ومن ساعة ما ظهر البترول في المنطقة العربية وكان مصدر للتنمية والثروة والثراء والتقدم ودا بعد ما زادت أهمية الوقود في العالم نتيجة التوسع الصناعي العالمي وزادت الحاجة كمان للغاز الطبيعي باعتباره مصدر طاقة مهم جدا..
مصر الطبيعة منحتها حاجات كتير أهم من البترول والغاز زي الموقع الجغرافي المتميز والثروات السياحية والحضارية على أرضها وتنوع مصادر الدخل بين قناة السويس والسياحة والترفيه والتسوق والاستثمار وتحويلات المصريين ودلوقتي بتعمل صناعة وبتعيد تعظيم موارد النقد عندها وبتشتغل في كل اتجاه عشان تبقي قوة اقتصادية اقليمية في المنطقة والعالم.
طيب ايه الجديد في قصة الموارد والثروات؟
شوف حضرتك مصر قررت تعيد اكتشاف ثرواتها النفطية من تاني وتدور على البترول والغاز والسولار في مناطق جديدة مع التقدم التكنولوجي في المجال دا واللي سمح بالوصول لطبقات جديدة في التربة والغريبة إن فيه تفاؤل كبير بين الشركات العالمية بخصوص مستقبل الاكتشافات وعمليات التنقيب ودا لأن مصر بتوقع بين بحرين للبترول واحد في منطقة الخليج في الشرق وبحر البترول في ليبيا غربا ولأن تقريبا المنطقة كلها نفس طبقات التربة فمصر على موعد مع اكتشافات ضخمة في القريب العاجل ولسه من ساعات شركة خالدة للبترول القائمة بالعمليات في منطقة تنمية كلاب أعلنت عن كشف بترولي جديد بالصحراء الغربية وتحديدا في منطقة غرب فيوبس -1 .
وقالت وزارة البترول عن الاكتشاف الجديد إنه بيوصل مبدئيا 7165 برميل زيت في اليوم بدرجة جودة 44 درجة و23 مليون قدم مكعب غاز مصاحب ودي نتايج أو عينة من الحقل يعني لسه في احتمالات الانتاج والاحتياطي تكون أكبر من كده بكتير.
مصر زي ماقلنا قررت تعيد اكتشف الثروة وعشان كده طرحت خلال سنتين مزايدات للتنقيب عن البترول في 35 منطقة للتنقيب عن الغاز والبترول منها 12 رقعة بالبحر المتوسط ودلتا النيل وبخلاف 23 منطقة تم الاعلان عنها في سبتمبر سنة 2023.
وزارة البترول والثروة المعدنية المصرية سبق وأعلنت كمان إنها بتخطط لحفر 35 بير جديدة للغاز الطبيعى باستثمارات تزيد على 1.5 مليار دولار خلال العامين الماليين 2023-2024 و 2024-2025 بهدف زيادة معدلات الإنتاج والاحتياطيات.
وكمان فيه خطةجاري تنفيذها لحفر 45 بئراً للغاز الطبيعي بالبحر المتوسط والدلتا باستثمارات نحو 1.9 مليار دولار، شملت حفر 10 آبار تم الانتهاء منها خلال العام المالي المنتهي في يونيو الماضي وأسفرت عن تحقيق عدد من الاكتشافات أهمها كشف نرجس بالبحر المتوسط باحتياطيات حوالي 2.5 تريليون قدم مكعب غاز.
