استثمارات بالملايين هتدخل مصر قريب... ومفاجأة في صناعة الأتوبيسات

يا ترى إيه اللي بيحصل في صناعة الأتوبيسات في مصر، وإيه علاقة الموضوع بالهند، هل في شراكة جديدة عشان نستورد أو نصدر لها الأتوبيسات، ولا استثمارات جديدة داخلة البلد في الصناعة دي.. هنقولك كل التفاصيل في الفيديو ده.
 

الدولة دلوقتي مهتمة جدًا بتوطين الصناعات في مصر، بمعنى إنه هيتم بناء مصانع لكل حاجة بنستخدمها جوه البلد ومش هنستورد تاني، وكمان هنتعاقد مع الشركات الأم أو الشركات المصنعة تيجي تبني مصانع لها في مصر، سواء في الصناعات الخفيفة أو التقيلة، واللي من أهمها صناعة الموبايلات ووسائل النقل والمواصلات زي الأتوبيسات.

وفي الساعات الأخيرة، الوزير المفوض يحيي الواثق بالله رئيس التمثيل التجاري، اجتمع مع رؤساء شركات هندية كبيرة، عشان يبحث إمكانية دخول الشركات دي مصر، وضخ استثمارات داخل الدولة، وكان اللقاء ده على هامش زيارته للهند للمشاركة فى مؤتمر الأعمال الهندى الأفريقي .

الوزير، قابل أكبر شركة هندية شغالة في مجال المفروشات المنزلية، وواحدة من أكبر 5 شركات فى العالم فى المجال ده، واتكلم معاهم على خطة توسعات الشركة وفتح سوق لها داخل مصر، ومش بس كده الوزير أقنعها بالعمل في هذه الصناعة داخل مصر، وبعد كده التصدير لأسواق الدول الأوروبية والعربية والأفريقية وكمان الولايات المتحدة الأمريكية.

وناقش كمان التكاليف الاستثمارية المرتبطة بالحصول على الأرض وأسعار الطاقة والعمالة، بالإضافة للحوافز الاستثمارية المقدمة من مصر للشركة الهندية، وخاصة فى المنطقة الاقتصادية لقناة السويس، وبالفعل اتفقوا على الترتيب لزيارة لوفد الشركة في مصر، عشان يعملوا اجتماعات مع الحكومة ويحطوا دراسة جدوي لإقامة مشروع استثماري هندي داخل مصر.

كمان الوزير، اجتمع مع مسئولي شركة Hinduja، المعروف عنها بأنها أكبر الشركات الهندية العاملة فى مجال إنتاج الاتوبيسات والنقل الخفيف، واتفق معاها على دخول السوق المصري والاستثمار عندنا في مجال إنتاج الأوتوبيسات، باعتباره من أهم الصناعات في مصر، وكمان لأن بيعتمد عليها ملايين المواطنين يوميًا، وده لأن الأتوبيسات من أهم وسائل المواصلات في الشارع المصري.

وواضح إن الوزير المفوض التجاري، إنه مُصر يجيب استثمارات من الهند بأي طريقة، عشان كده اجتمع كمان مع مسئولي شركة "اوكيور" للطاقة، واللي دخلت مصر بمشروع إنتاج الهيدروجين الأخضر باستثمارات ٤.٢ مليار دولار، والمشروع ده تم توقيعه على هامش مؤتمر الاستثمار الأوروبي فى القاهرة.

كل دي خطوات ممتازة، لكن الوزير  موقفش وكمل رحلته مع الشركات الهندية، وقابل مسئولى شركة Air India واللي بتدير ابخطوط الجوية الهندية، وبحث معاها إمكانات فتح خط طيران مباشر للشركة بين نيودلهي والقاهرة، بالإضافة للتعرف على فرص زيادة حركة النقل والسياحة والتجارة بين البلدين وإمكانية استخدام مصر كمركز لوجستي للدول الأخرى.

كمان اجتمع مع أكبر الشركات الهندية المنتجة لأسود الكربون، وناقش إمكانية استيراد الفوسفات الصخري من مصر لاستخدامه فى إنتاج أسود الكربون.

وقايمة الزيارة كمان شملت شركةJackson، وهي من أكبر الشركات الهندية الرائدة فى مجال إنتاج المعدات الهندسة والمعدات المستخدمة فى إنتاج الهيدروجين الأخضر من المايه، واستعراض خطط الحكومة المصرية عشان تكون مركز إقليمي للطاقة والطاقة المتجددة، وإمكانية مشروع استثماري للشركة فى مصر.

تحركات الوزير المفوض في الهند بتؤكد إن الحكومة بتدعم بقوة ملف جذب الاستثمارات الخارجية، واستقطاب الشركات العالمية الكبرى لمصر، عشان تقوي اقصادنا من ناحية، وتوفر كل المستلزمات اللي بيحتاجها المصريين بأسعار منخفضة من ناحية تانية، ده غير تقليل فاتورة الاستيراد خلال الفترة الجاية، وفي الحقيقة دي خطة في منتهى الذكاء وهتخلي مصر في حتة تانية خالص.