لغز انتكاسة الدولار.. ومصير الدهب القديم بعد الدمغة الجديدة.. شركة صينية لمواجهة سرقة الكهرباء في مصر.. وشروط صندوق النقد الجديدة

متابعينا الكرام في كل مكان أهلا وسهلا بكم وتحليل جديد لاهم التقارير اللي قدمتها وحدة أبحاث بانكير على مدار اليوم الاثنين 26 أغطسطس 2024.

منصات بانكير قدمت تقارير وتحليلات لاحداث وقرارات كتير النهاردة ومن بينها تقرير عن سر انخفاض الدولار على مدار الايام اللي فاتت..

وأشار التقرير إلى استقرار سعر الدولار في البنوك بداية من الاسبوع الحالي عند متوسط 48.73 حنيه وبعدها نزل 5 قروش في منتصف تعاملات النهاردة ليسجل 48.68 جنيه.

وشرح بانكير إن انخفاض سعر الدولار مش مفاجأة في سوق الصرف لان  السعر مرهون بالعرض والطلب المعتمد على تحرير سعر الصرف من مارس اللي فات وطالما السعر نزل يبقي فيه زيادة في المعروض وانخفاض في الطلب .

وسلط بانكير الضوء على جهود الدولة في توفير العملة الصعبة وقال إن تحقيق معادلة زيادة معروض الدولار مجاش من فراغ لأن الحكومة شغالة ليل نهار على قصة توفير الدولار من كل القطاعات الاقتصادية في البلد ودا غير خطط تانية لترشيده زي خطة توطين الصناعة والتصدير.

ولفت بانكير إن فيه سبب تاني لانخفاض سعر الدولار في الأيام اللي فاتت وهو التحسن الكبير في القطاع المصرفى فيما يتعلق بالتدفقات من العملة الأجنبية ، خاصة مع عودة الاستثمارات فى أدوات الدين وبخلاف الزيادة فى حجم تحويلات المصريين فى الخارج  إلى جانب صفقة رأس الحكمة اللي ساهمت جميعها بشكل كبير فى حدوث وفرة من العملة الأمريكية.

مش كده وبس دا كمان استثمارات الأجانب فى أذون الخزانة المحلية  قفزت إلى 37.5 مليار دولار بنهاية مايو الماضي، من 35.2 مليار فى أبريل.

منصات بانكير قدمت تقرير مختلف وبيهم ملايين المصريين وهو بخصوص مصير الدهب القديم بعد تطبيق دمغة الليزر الجديدة

وشرح التقرير إنه على مدار الأيام اللي فاتت انتشر كلام عن قرب تطبيق نظام جديد ومعتمد لدمغ الدهب هيعتمد على الليزر والتكنولوجيا الحديثة وانتهاء العمل بالدمغة القديمة وهنا الناس بدأت تسأل عن مصير الدهب اللي اشترته لما تفكر تبيعه وهل قيمته هتزل ولا لأ

وسلط التقرير الضوء على تصريحات الدكتور شريف فاروق، وزير التموين والتجارة الداخلية،  واللي قال فيها  إنه هيتم تطبيق الدمغة بالليزر قبل نهاية  2024، ودا تحسبا لارتفاع الأسعار وإلغاء الدمغة القديمة.

وشرح بانكير إن وزير التموين قال كمان إن الوزارة حريصة على  استكمال منظومة التكويد ودمغ المشغولات الدهبية والمعادن الثمينة بالليزر لما لهذا المشروع من أهمية كبيرة في مجال صناعة الدهب واستخدام التكنولوجيا الحديثة لضمان حوكمة المعادن الثمينة بالليزر وقطع الطريق على محاولات تزوير الدمغة القديمة والتلاعب في المعروض من المعدن الأصفر.

وعن سر تدميغ الدهب بالليزر شرح التقرير إن نظام الدمغ بالليزر هيساعد على تعزيز الرقابة على أسواق المعادن والاحجار الكريمة من خلال الحد من الممارسات  اللي بتعرض المواطن للاحتيال والخداع.

ولفت التقرير لمصير الدهب القديم.. وقال إن الكلام دا غير صحيح وإن الدهب القديم هيصلح للبيع والشراء وبدون ماقيمته تقل ومفيش قرار بشأنه وان نظام الدمغة الجديد مجرد عملية تنظمية فقط.

وحدة أبحاث بانكير قدمت تقرير خاص النهاردة عن مصير المراجعة الرابعة لصندوق النقد الدولي بخصوص صرف شريحة بقيمة مليار و300 مليون دولار ضمن قرض الـ8 مليار دولار.

وقال التقرير إنه بعد صرف مصر الشريحة التالتة  صندوق النقد الدولي بيتسعد لمراجعة الشريحة الرابعة واللي بتقدر ب1.3 مليار دولار وحسب مصادر خاصة البعثة الفنية للصندوق قررت تأجيل زيارتها لمصر إلى أول أكتوبر بدل من سبتمبر ودا لمراجعة بقية بنود برنامج الإصلاح الاقتصادي ورفع تقرير للمجلس التنفيذي للصندوق ..

وشرح بانكير إنه حسب المعلومات المتاحة بعثة صندوق النقد الدولي اللي هتزور مصر هتركز على عدد من النقاط، منها مصير الدعم، وتحجيم الإعفاءات الضريبية، وزيادة الإيرادات بخلاف التركيز على رفع القيود على استيراد السلع.. 
ولفت التقرير إن شرط رفع القيود عن الاستيراد دا مكنش معروف قبل كده ومحدش قال عليه وفيه فعلاً تحرك إيجابي في البند دا، وشفنا إزاي  البنوك أعلنت العودة لتمويل العديد من السلع غير الأساسية واللي كانت محظور استيرادها ضمن خطة وقف نزيف الدولار وتقديم الأولويات في ذروة أزمة نقص الدولار وحسب المصادر  البنوك هتبدأ من أكتوبر الجاي فتح  أكثر على تمويل السلع غير الأساسية وفق أولويات كل بنك والتمويل المتاح له.

التقرير الاخير معانا النهاردة مختلف شوية وهو خاص بخطة الحكومة لمواجهة ظاهرة سرقة التيار الكهربائي.
وقال التقرير إنه في البداية إنه وفقا لأرقام معلنة بتتخطى قيمة سرقات التيار الكهربائي الشهرية بجميع شركات التوزيع مئات الملايين من الجنيهات والمسئولين فى وزارة الكهربا شايفين ان زيادة تعريفة المحاسبة على سرقة التيار هتقلل بشكل ملحوظ من عمليات الحصول على التيار بطريقة غير مشروعة بجانب العقوبات الجديدة فى القانون واللى مش بتكون مجرد غرامة مالية بس ولكن كمان بتوصل للحبس لمدد تتراوح بين 6 شهور وسنة.

ولفت بانكير إن وزير الكهرباء محمود عصمت اجتمع مؤخرا مع مسؤولي شركة هواوي الصينية في إطار الخطة العاجلة للتصدي لظاهرة سرقة الكهرباء على كافة الاستخدامات عن طريق الاستعانة بأجهزة ذكية في نقاط محددة على مستوى شبكة التوزيع لحساب الطاقة وكشف التلاعب في معدلات الاستهلاك  

وقال التقرير إن  أى حد بيستولى على التيار الكهربائي دون وجه حق لازم يوقف ده فورا ولو هو مش مشترك لازم يروح شركة الكهربا التابع ليها ويطلب الاشتراك والحصول على عداد شرعي ويشوف مع الشركة ممكن يسوى الفترة اللى فاتت ازاى وفيه تسهيلات بتقدمها الشركات زي تقسيط المديونية القديمة على الفواتير الجاية.