مفاجأة في سوق الأجهزة الكهربائية والمنزلية.. شوف وصلت لكام

في مفاجاة من العيار الثقيل، شعبة الأجهزة الكهربائية والمنزلية باتحاد الصناعات أعلنت عن انخفاض اسعار الأجهزة والكهربائية.. يا تري اية الاسباب اللي خلت الأجهزة تنخفض والأسعار دلوقتي وصلت لكام

الاصلاحات الاقتصادية اللي قامت بيها الدولة علي مدار الشهور اللي فاتت كان لها انعكاسات كتيرة علي كل اسعار السلع والخدمات اللي بيحتاجها المواطن في حياته اليومية خصوصا انها قضت تماما علي وجود سعرين للدولار في مصر، وحاليا بقي الدولار موجود ومتوفر قدام التجار والمستوردين في البنوك وبسعره الرسمي علشان يقدروا يستوردوا البضائع والحاجات اللي الشارع والسوق المصري محتاجها من الخارج.
قطاع الأجهزة الكهربائية واحد من اهم القطاعات اللي كان متاثر بوجود سعرين للدولار في مصر، وكان سعر الاجهزة صعب علي اي حد مواطن يقدر يشتري احتيجاته منها، خصوصا أن سعر الجهاز وصل لارقام فلكية، ولكن بعد الاستقرار الاقتصادي والقرارات الجرئية اللي اخذتها الدولة لاستقرار سوق صرف العملات في مصر بدأت اسعار الأجهزة الكهربائية والمنزلية ترجع مرة تانية لطبيعتها وتكون مستقرة بشكل كبير، وحاليا في اقبال كبير من المواطنين للشراء بعد فترة طويلة المواطن المصري كان فيها بعيد عن شراء الاجهزة المنزلية والكهربائية بشكل كامل .
طيب اسعار الأجهزة المنزلية والكهربائية وصلت لكام دولوقتي ؟.
حسن مبروك، رئيس شعبة الأجهزة الكهربائية والمنزلية باتحاد الصناعات، قال أن أسعار الأجهزة الكهربائية والمنزلية انخفضت بشكل كبير في الفترة الأخيرة، وأن الانخفاض ده سببه زيادة الإفراجات الجمركية الأخيرة واستقرار سعر صرف الدولار وتوفيره وعودة المصانع اللي كانت متوقفة عن العمل للتشغيل مرة تانية .
رئيس شعبة الأجهزة الكهربائية والمنزلية باتحاد الصناعات قال كمان أن تراجع تكلفة الإنتاج بسبب انخفاض سعر الدولار هيؤدي  لانخفاض جديد في اسعار الأجهزة الكهربائية والمنزلية بشكل كبير والمواطن هيحس الانخفاض ده في كل الاسعار .
مبروك قال شدد كمان على أهمية ضبط ومراقبة الأسواق بدقة، لضمان عدم التلاعب بالأسعار وتجنب حدوث زيادات جديدة، خصوصا أن الفترة اللي فاتت الأسعار ارتفعت بشكل كبير ومن غير مبرر، وده أدي لزيادة أسعار بعض الأجهزة لمستويات عالية نتيجة لعدم توافر الدولار وتوقف الإنتاج من قبل المصانع.
مبروك قال أن أسعار الغسالات الأتوماتيكية بتتراوح بين 18 ألف جنيه و55 ألف جنيه، وأسعار المراوح بتبدأ من 600 جنيه وبتوصل إلى 3000 جنيه، وأسعار المكاوي بتتراوح بين 500 و3000 جنيه، وأسعار التكييفات بقدرة 1.5 حصان بتتراوح بين 18 و25 ألف جنيه، بعد ما كانت بتتراوح بين 25 و30 ألف جنيه، وتكييفات بقدرة 2.25 حصان بتتراوح بين 28 و35 ألف جنيه، بعد ما كانت بتتراوح بين 34 و40 ألف جنيه، وتكييفات بقدرة 3 حصان بتتراوح بين 39 و45 ألف جنيه، بعد ما سعرها بيتراوح ما بين 42 و50 ألف جنيه.