محدش يلعب مع المركزي تاني.. تطور مهم في ملف الدولار

يا ترى ايه اللى بيحصل فى سوق صرف العملات الأجنبية فى مصر؟ وازاى سعر الدولار قفز يشكل كبير ومرة واحدة رجع ينخفض من تاني؟ وايه علاقة اللى حصل بالمضاربات على العملة ومحاولة استغلال تلميحات صندوق النقد الدولي؟

أى حد متابع اللى بيحصل فى سوق صرف العملات الجنبية هيلاحظ ان فيه ارتباك واضح بيحصل فى التعاملات الأخيرة وهيلاحظ كمان ان سعر الدولار طالع نازل وبعد ماكان قفز قفزة كبيرة بدأ فى اخر يومين رحلة الهبوط

فيا ترى ايه اللى بيحصل بالظبط ؟ وهل الدولار هيزيد الأيام الجاية ولا هتستمر رحلة الهبوط؟

فى الساعات الأخيرة انخفض سعر الدولار مقابل الجنيه  في عدد من البنوك الحكومية والخاصة وشركات الصرافة العاملة بالقطاع المصرفي بمصر ووصل حجم الانخفاض الى اكتر من 10 قروش وقبلها كان انخفض بحوالى 40 قرش مرة واحدة .. ووفقًا لما كشفته آخر تحديثات المواقع الرسمية للبنوك الحكومية والخاصة سجّل متوسط سعر الدولار في مصر  حوالي 49.05 لكل دولار للشراء، مقابل 49.15 جنيه لكل دولار للبيع حسب بيانات المركزي المصري بعد ماكن وصل الى مستويات 49.70 جنيه

وخد بالك التذبذب اللى بيحصل ده بيؤكد ان البنك المركزي بيطبق سعر صرف مرن بيعتمد فى تحديد سعر الجنيه على اليات السوق وقوانين العرض والطلب وطبيعي لما يزيد الاقبال على الدولار سعره يرتفع والعكس صحيح لما يقل الطلب السعر هينزل اتوماتيك

طب ايه اللى عملوا المركزي لضبط السوق ومنع عودة المضاربات؟

من بعد الاعلان صندوق النقد نهاية الشهر اللى فات الموافق على المراجعة التالتة لبرنامج مصر الاقتصادي وصرف شريحة جديدة من قرض التلاتة مليار دولار بقيمة 820 مليون دولار بدأ يطلع كلام من مسئولين فى الصندوق وتليمحات عن ان الحكومة المصرية بتتدخل فى سعر الدولار وان الحل الوحيد لنجاح برنامجها مع الصندوق الاستمرار فى مرونة سعر الصرف وطبعا فيه أطراف حاولت تستغل التلميحات دي وتعيد من جديد المضاربة على الدولار وترفع سعر العملة الأمريكية وتزامن مع الالاعيب دي خروج جزء بيمثل حوالى 8% من اجمالى الأموال الساخنة بسبب الاضطرابات اللى حصلت فى اسواق المال العالمية وهنا حصل طلب متزايد على الدولار وسعره كان بيرتفع تقريبا كل يوم وهنا البنك المركزي تدخل لضبط الفوضى ووقف اى مضاربات على العملة وضخ كمية من الدولارات فى البنوك ساهمت فى توفير احتياجات الشركات والمصدرين وده خلا السوق يهدا وخلا المضاربين يرجعوا لجحورهم من جديد

طب هل الدولار الفترة الجاية هيزيد ولا ايه الدنيا؟

زي ما قولنا لحضراتكم مصصر حاليا بتطبق سعر صرف مرن وطبيعى شوية الدولار يزيد وشوية ينزل وكل ده بيعتمد بشكل اساسي على مدى توافر الدولار ومدى نجاح الحكومة فى توفير عملة صعبة وعشان كده هتلاحظوا ان فيه اهتمام مؤخرا بملف التصنيع وزيادة الصادرات لأن ده هو اللى هيوفر دولار مستدام وهيخفف الضغط عن الاحتياطي