ينقل 1.5 مليون راكب يوميا.. اعرف معدلات تنفيذ مترو "الهرم- أكتوبر"
يا ترى إيه قصة خط المترو الجديد المعروف بالخط الرابع، وهيخدم أي مناطق، وطاقته الاستيعابية هتكون كام راكب في اليوم، وامته هنشوفه شغال على أرض الواقع.. هنقولك كل التفاصيل في التقرير التالي.
الفترة دي، وزارة النقل ممثلة في الهيئة القومية للأنفاق، عندها تكليفات من القيادة السياسية بتسريع إنجاز مشروعات مترو الأنفاق، لأن المترو طبعًا أفضل وآأمن وسيلة مواصلات، وكمان بيوفر الوقت والجهد ومبيقفش كتير.
وبالفعل، وزارة النقل شغالة على التكليفات الرئاسية دي ليل نهار، وبعد ما انتهت بشكل شبه كامل من تنفيذ 3 خطوط للمترو آخرهم الخط التالت للمترو المعروف بمترو "العتبة/ عدلي منصور)، اتجهت دلوقتي للخط الرابع.
والخط الرابع للمترو، تم البدء في المرحلة الأولى له، واللي اسمها مترو "الهرم- أكتوبر"، واللي هيربط مدينة 6 أكتوبر بالقاهرة الجديدة، كمان هيقدم خدمة لنقل الركاب للمناطق اللي فيها كثافة سكانية عالية في مناطق: الهرم وفيصل والعمرانية والجيزة ومدينة نصر وجامعة الازهر والقاهرة الجديدة، وبالتالي كل اللي ساكن في المناطق دي هيخدمهم الخط الرابع للمترو.
وطول خط مترو"الهرم / أكتوبر" هو 42 كيلو متر، وعدد محطاته 39 محطة، ومتوقع أنه ينقل الخط حوالي 1.5 مليون راكب يوميا.
نيجي للمرحلة الأولى منه، واللي بتمتد من غرب الطريق الدائرى على حدود مدينة 6 أكتوبر مروراً بمحطة المتحف المصرى الكبير ثم ميدان الرماية ثم شارع الهرم حتى محطة الجيزة ليتقاطع مع الخط الثانى للمترو ثم يمتد بعد ذلك ليتقاطع مع الخط الأول للمترو بمحطة الملك الصالح ثم يمتد حتى محطة الفسطاط .
طولها 19 كم و17 محطة منها ( 16 نفقية ) وهي ( الفسطاط – الملك الصالح – الروضة - ميدان الجيزة – الجيزة – المساحة – مدكور – الطالبية – المطبعة – العريش – المريوطية – الأهرامات – الرماية – المتحف المصري الكبير – النصر – حدائق الأهرام ) + ( 1 سطحية ) هي محطة ( حدائق الأشجار ) .
وحاليا، بيتم تنفيذ محطة المساحة ومحطة حدائق الاشجار ، واللي وصلت نسبة الإنجاز إلى 30%، وكمان الهيئة شغال في المسافة من محطة المساحة حتى محطة الفسطاط.
كمان، حاليًا بيتم حفر الجزء النفقى من بئر النزول عند محطة حدائق الأشجار وحتى محطة الأهرامات بطول حوالى 5.4 كم، وده بواسطة ماكينة الحفر النفقي الأولى، وكمان بيتم حفر الجزء النفقي بين محطة الأهرامات وحتى محطة المساحة بطول حوالى 4.5 كم .
والمرحلة الثانية من الخط الرابع للمترو، بتمتد من محطة الفسطاط حتى محطة مجرى العيون، بعد كده المترو هيتقاطع مع الخط السادس لمترو الأنفاق، ثم يمتد إلى شارع صلاح سالم ثم طريق النصر وحتى نادى المقاولون العرب لينتهى فى مركز النقل المجمع شمال تقاطع الطريق الدائرى مع طريق القاهرة / السويس مروراً بمدينة نصر والرحاب.
وفي مفاجأة خاصة بتشغيل الخط الرابع للمترو، وهي إن اليابان ممثلة في وكالة "الجايكا" اليابانية قدمت عرض لوزير النقل الفريق كامل الوزير لتشغيل الخط ده، وإن شاء الله بعد انتهاء تنفيذ الخط بالكامل هيتم تسليم إدارته لليابان.
