غاب 50 سنة.. حدث تاريخي يغير شكل سيناء للأبد
يا ترى إيه اللي بيحصل في سيناء دلوقتي، وايه حكاية الحدث اللي هيقلب موازين التنمية والاعمار والتجارة والصناعة والنقل في ارض الفيروز وايه علاقة ده كله بالأمن القومي لمصر.. هنقولك كل التفاصيل في الفيديو ده.
من ساعات، وزارة النقل أعلنت عن احتفالها بعبور أول قطار سكة حديد لسيناء، وكانت بداية رحلته من ميناء الدخيلة ثم ميناء شرق بورسعيد وصولا لمحطة بئر العبد، وده جه في الوقت اللي بنحتفل فيه بمرور 9 سنوات على افتتاح قناة السويس الجديدة.
من هنا، الفريق كامل الوزير وزير النقل والصناعة، قال إن أول رحلة مرت بخط سكك حديد سيناء، كانت لقطر بضاعة "حاويات ترانزيت"، وكان مكون من عدد 25 حاوية ( 40 قدم)، وتابع لشركة الإسكندرية لتداول الحاويات، واتحرك زي ما قولنا من ميناء الدخيلة لحد ميناء شرق بورسعيد، وبعد كده عبر المحطة التبادلية بالكم 8، ثم وصلة بالوظة / شرق بورسعيد، المتفرعة من خط الفردان / بئر العبد.
وكانت هيئة السكة الحديد، انتهت من تجديد وإعادة تأهيل مسار خط "الفردان/ بئر العبد"، والمعروف باسم خط سكك حديد سيناء، أو المرحلة الأولى منه، واللي هي بطول 100 كيبو متر، وده حصل بعد غياب الخدمة عن الخط ده أكتر من 50 سنة، لأن السكة بتاعته اتسرقت بعد أحداث ثورة 25 يناير 2011.
لكن، كامل الوزير أصدر فرمانه بتجديد واستعادة كفاءة محطات الخط ده، واللي هي: (محطات القنطرة شرق وبالوظة ونجيلة وبئر العبد)، ومقرر تطوير باقي الخط عشان يوصل للعريش.
وكتير مايعرفوش، إن عودة تشغيل خط سكك حديد سيناء للبضائع بيعتبر إضافة قوية لوسائل النقل والمواصلات في ربوع سيناء الحبيبة، وكمان الممر اللوجيستي التنموي "العريش/طابا" هيساهم في تحقيق التنمية الشاملة في سيناء.
ضيف على كل ده، إن له عوائد اقتصادية كتيرة، زي أنه هيخدم أهالي شمال ووسط وجنوب سيناء، وهيكون المشروع ده جزء من خطة الدولة المصرية لتنمية سيناء في كافة المجالات، بجانب خدمةه منظومة نقل البضائع، وكمان التجمعات السكنية والصناعية والتعدينية بسيناء عن طريق ربط المصانع بوصلات سكك حديدية ثم التصدير عبر ميناء العريش وطابا إلى الخارج، لأن الخط ده بيرتبط مع شبكة السكك الحديدية بأنحاء الجمهورية، وهيحقق الخط نقلة نوعية على طريق تحقيق الأهداف التنموية على أرض الفيروز.
كمان نقدر نقول إن الخط ده هيربط أماكن التصنيع بسيناء زي مصانع الأسمنت بالعريش ومصانع الرخام بمواني طابا الربط بين موانئ البحر الأحمر "طابا - نوبيع" بموانئ البحر المتوسط "العريش – شرق بورسعيد".
الأهم بقي أن عودة القطارات لسيناء مش مجرد مشروع هيدفع التنمية لكن ليه كمان بعد أمن قومي كبير لانه بيعزز ارتباط سينا ببقية الجمهورية وهيقطع الطريق على اي محاولة لاستغلال بعد سينا عن الدلتا وهيفتح الطريق لتعميرها وتوطين المواطنين هناك مع المشروعات الجديدة اللي بتتعمل وهتزيد مع عودة خطوط السكك الحديدية بعد غياب عشرات السنين.
وفي النهاية.. الركاب دلوقتي بيسألوا السكة الحديد: قطارات الركاب على خط سيناء هتشتغل امته؟ .. واحنا كمان بنوجه نفس السؤال لهيئة السكة الحديد.
