لو انت منهم.. شوف هتدفع كام لو موصل سلك كهربا من ورا العداد

سرقة التيار الكهربائي واحدة من أهم القضايا اللي شغاله عليها الدولة حاليا خصوصا إن سرقة التيار وصلت لنسب كبيرة جدا من الطاقة اللي محطات التوليد بتنتجها.. يا تري الدولة بتعمل اية في موضوع سرقة للتيار الكهربائي اية عقوبة السرقة 
 
أزمة تخفيف الاحمال علي الشبكة القومية للكهرباء واللي كلنا عانينا منها علي مدار سنة كاملة والكهرباء كانت بتقطع عن كل البيوت والشوارع والمحافظات واللي بسببها الدولة دفعت فاتورة كبيرة جدا من الدولارات علشان تستورد وقود تشغل بيه محطات توليد الكهرباء علشان تولد الكهرباء وتنتهي أزمة تخفيف الاحمال.
واحد من أهم أسباب أزمة تخفيف الاحمال علي الشبكة القومية للكهرباء هو سرقة التيار الكهربائي واللي وصلت لنسبة كبيرة من الطاقة اللي محطات توليد الكهرباء بتنتحها ووصلت نسبة السرقة في الكهرباء ل60% من الطاقة بشركة جنوب القاهرة لتوزيع الكهرباء واللي بسببها الدكتور محمد شاكر وزير الكهرباء والطاقة المتجددة السابق اقال المهندس مدحت فودة رئيس شركة جنوب القاهرة لتوزيع الكهرباء ، خصوصا أن الشركة فشلت في عهده في السيطرة علي سرقة الكهرباء .
طيب اية اللي بيحصل في موضوع سرقة الكهرباء دلوقتي ؟.
دلوقتي الدولة ممثلة في وزارة الكهرباء والطاقة المتجددة ووزارة الداخلية ممثل في قطاع شرطة الكهرباء قامين بخطوات كبية جدا لمواجهة سرقة التيار، وكمان وزارة الكهرباء عطت الضبطية القضائية للموظفين اللي ينزلوا بحملات للتفتيش علي البيوت المناطق والاحياء السكنية واللي بتلف كل المحافظات حاليا .
حملات التفتيش علي الكهرباء بتيجي تفتش إلي البيوت بشكل مفاجئ ومش البيوت اللي مركبة عدادات قديمة بس لا ده كمان في حملات تفتيش علي البيوت اللي فيها عدادات مسبقة الدفع وكمان العدادات الكودية، وموظفين وزارة الكهرباء معاهم جهاز صغير كده بيحطه علي العداد بتظهر  فيه كل البيانات ولو في واقعة سرقة قبل كده، ولو في سرقة أو سلك متمرر من وراء العداد وفي حالة لو المواطن أو صاحي البيت كان بيسرق كهرباء هتتوقع عليه غرامة كبيرة جدا وممكن توصل للسجن .
طيب غرامة سرقة الكهرباء وزارة الكهرباء والطاقة المتجددة بتتقدر ازاي ؟.
وزارة الكهرباء والطاقة المتجددة حددت عقوبة سرقة التيار في المادة 31 من اللائحة التجارية لشركات التوزيع وبتكون حساب التكلفة علي أساس حساب قيمة متوسط الاستهلاك الشهري بسعر أعلى شريحة محاسبة، وموظف الكهرباء بيستبعد قيمة المحاسبة اللي كان عليها المواطن وفقًا لفواتير الاستهلاك الشهرية، وبيكون الناتج هو قيمة التيار المسروق بسعر أعلى شريحة استهلاك ويتم مضاعفة القيمة دي وكمان الموظف بيراعي حق الشركة في مضاعفة القيمة في حالة تكرار السرقة وحقها فى فسخ العقد دون تنبيه أو إنذار.
طيب اللي هيحصل للناس اللي مركبة أو شغالة بنظام الممارسة في استهلاك الكهرباء ؟.
الدكتور مصطفى مدبولي رئيس الوزراء وجه وزير الكهرباء والطاقة المتجددة بتركيب عدادات كودية لكل الناس اللي شغالة في نظام استهلاك الكهرباء بنظام الممارسة، وتركيب العدادات هيكون اجباري، يعني مش بمزاج المواطن العداد هيركب يعني هيركب، وتركيبة المواطن يقدر يدفعه كاش او قسط زي ما هو عايز، وده علشان الدولة اكتشفت أن في ناس من اللي شغالين بنظام الممارسة. استهلاكم اعلي بكتير من الرقم اللي بيدفعوه مقابل الخدمة اللي متوصله لهم.