تعويم جديد على الأبواب بعد خروج الأموال الساخنة مرة تانية.. السوق بيقول إيه

إيه الكلام اللي بيتقال على تعويم جديد للجنيه وإزاي يكون فيه تعويم في وقت السوق ماشي على سياسة السعر المرن يعني محدش بيتحكم فيه.. طيب ازاي صندوق النقد طلب المزيد من تحرير سعر الصرف.. وإيه علاقة التعويم الجديد باللي حصل في سوق السندات المصرية.. كل الاسئلة دي هنعرفها مع حضراتكم في الفيديو دا تابعونا للنهاية.

من ساعة صندوق النقد الدولي ماوافق على صرف الشريحة التالتة من القرض المصري بقيمة 820 مليون دولار والتصريحات اللي طلع قالها وقتها بأن الحكومة المصرية مطالبة بتكريس سياسة السعر المرن للجنيه وإزالة كل المعوقات أمام السعر الحر والناس بدأت تتكلم على التعويم الجديد اللي جاي والحقيقة حصلت حيرة كبيرة إزاي يبقي فيه تعويم جديد والدولار طالع نازل براحته حسب العرض والطلب من 6 مارس اللي فات بعد اعتماد البنك المركزي لسياسة التعويم والسعر المرن ورفع ايده من على الجنيه وشفنا السعر الرسمي قفز ازاي وقتها من 30 جنيه للدولار الواحد إلى أكتر من 49 جنيه ودا بيأكد إن الدولار بقي حر..

أومال ايه اللي عاوزة الصندوق من مزيد من السعر المرن؟
كلام الصندوق وتصريحاته تأكيد على اللي اتنفذ بالفعل وبيقول كده عشان يضمن ان الحكومة تفضل بعيد عن التدخل أو توجيه سوق الصرف لو حصلت قفزة في الاسعار لكن الحقيقة على الارض هي إن الدولار بيتحرك بحرية في سوق الصرف وعشان كده الكلام على تعويم جديد ملهوش أي محل من الاعراب لأنه منطقيا الدولار مفيش أي قيود عليه بدليل إن سعره قفز امبارح وقرب على ال50 جنيه والبنك المركزي متحركش ولا اتدخل في تحديد السعر.

طيب إيه حكاية الأموال الساخنة واللي التعويم مرتبط بيها؟
زي ماقلنا لحضراتكم قبل كده الاموال الساخنة أو الاسثمارات الغير مباشرة دي هي أموال حايمة وطايرة في العالم كله وبتستثمر بنظرية اكسب واجري وغالبا بتشتغل في السندات وأذون الخزانة واللي هي ديون الحكومة والفكرة إن اصحاب الاموال الساخنة دول بيتنازلوا عن الدولار وبياخدو فوايد بالجنيه من اذون الخزانة أو السندات الحكومية واللي فايدتها بتكون عالية جدا وبيكسبو كتير من فرق سعر العملة لكن الأموال الساخنة معروفة إنه أموال جبانة وبتهرب في أول أزمة ودا اللي حصل قبل كده في 2022 وحصل اليومين دول وفيه تقارير بتقول إن حوالي مابين 4 و5 مليار دولار خرجت من السوق المصري وهي عبارة عن أموال ساخنة والربط بينها وبين التعويم الجديد إن خروج الاموال دي بيسبب فجوة أو مطب هوا وسعر الدولار بيزيد بشكل كبير في فترة زمنية كبيرة وبعدها المركزي اتدخل وحمي الجنيه قبل كده لكن دا مبقاش مسموح بيه دلوقتي لأن فيه سياسة الدولة ملتزمة بيها وهي السعر الحر وعدم التدخل في سوق الصرف.