الدولار داخل على 49 جنيه.. هو صحيح السوق السودا راجعة وتجار العملة هيحكموا السوق
ياترى الدولار رايح على فين وإيه حكاية الاسعار اللي بتضرب كل يوم دي في البنوك وهل دا طبيعي ولا فيه أزمة في سوق الصرف وليه ناس حذرت من عودة السوق السودا للدولار وايه مخطط تجار العملة عشان يرجعوا تاني.. كل ده هنعرفه في الفيديو التالي.
من يوم الاربع اللي فات ولغاية النهاردة الاحد الدولار الاميريكي سعره قفز لاكتر من 40 و50 قرش كمتوسط قدام الجنيه المصري ودي أكبر زيادة من ساعة التعويم في مارس اللي فات وخلاص الدولار داخل على 49 جنيه وفيه ناس وللاسف منهم خبراء رجحوا عودة السوق السودا للدولار وإن السعر هيعدي ال50 جنيه وهيتراوح ما بين 55 و60 جنيه في السوق الموازية..
طبعا اللي بيقول كده من بين ناس كتير يهمها إن تجار العملة يرجعوا تاني يتحكموا في السوق ويوصلوا الدولار لفوق ال70 جنيه عشان يحققوا مكاسب بالملايين لكن اللي هيحصل إن سوق العملة الموازية مش ممكن يرجع تاني خالص لأن القواعد اللي بتحكم سوق الصرف اتغيرت تماما وبقي العرض والطلب هو بس اللي بيحدد سعر الدولار ولا مكناش شفناه النهاردة داخل على 49 جنيه وبالعكس اللس بيحصل بيقول ويأكد إن فيه سعر مرن حقيقي وإلا البنك المركزي كان اتدخل وفرض حماية على الجنيه واتحكم في سعر الورقة الخضرا لكن دا خلاص زمن وفات والسوق هو البطل في تحديد السعر في كل ساعة ويوم وشفنا اازي الدولار سعره بيتغير أكتر من 10 مرات في التداول ودا بيحصل في كل بنوك العالم لأن دي طبيعة الحال في سوق العملة واللي بتعتبر زي أي سوق بيتحكم فيها الطلب والعرض.
طيب ليه الدولار من الاربع اللي فات بيزيد وزيادة مش طبيعية؟
الحقيقة الدولار سعره بيزيد من ساعة صندوق النقد ما طلب من الحكومة المصرية إنها ترفع اي قيود على سعر الصرف المرن والناس افتكرت إن فيه تعويم تاني ودا مش حقيقي لكن الصندوق لما قال كده كان بيأكد على التزام الحكومة بسعر الصرف الحر للعملات لكن في نفس الوقت بردو ارتفاع سعر الورقة الامريكية معناه ببساطة إن فيه طلب على الدولار بشكل كبير في الايام الأخيرة زي ماقلنا بالاضافة إلى خروج حوالي 4 مليار دولارمن الأموال الساخنة أو الاستثمارات التيك أواي زي مابيسموها بتوع الاقتصاد من السوق المصري.
والأموال الساخنة سبق واتكلمنا عليها بالتفصيل وقلنا إنها أموال سريعة الهروب من الاسواق وبتعتمد على الاستثمار في أدوات الدين الحكومية واذون الخزانة ومش بتعتبر استثمارات مباشرة لأنها مش بتستثمر في الأصول أو بتعمل مشروعات مثلا والرقم طبعا عمل فجوة بسيطة جدا لكن تجار العملة ماصدقوا طبعا عشان ينشروا الاشاعات إن الدولار مش موجود في البنوك وإن السوق السودا رجعت تاني..
