لو عاوز تعرف سر ارتفاع سعر الدولار؟.. لازم تقرأ التقرير دى
يا ترى ليه سعر الدولار بيزيد بشكل ملحوظ خلال الأيام الأخيرة؟ وهل الارتفاع ده هيستمر ولا ممكن يكون ارتفاع مؤقت والأمور هتستقر فى سوق الصرف؟ وايه علاقة ايران وفلسطين باللى حصل للعملة الأمريكية فى مصر؟
لازم كلنا نكون عارفن ان العالم أصبح قرية صغيرة بالفعل وأى حدث كبير فى اى دولة بيكون ليه تداعيات خطيرة على باقي الدول .. يعنى مش لازم بلدك او دولتك تكون فى مشكلة مع دولة تانية عشان تتأثر انت ممكن تكون قاعد فى حالك ويحصل حاجة جنبك تأثر على اقتصادك وتربك حساباتك وده اللى حصل بالظبط فى موضوع الدولار وفى سوق الصرف عامة فى اخر اسبوع
واللى متابع هيعرف ان سعر العملة الأمريكية من مارس اللى فات تقريبا بتشهد حالة من الهدوء والاستقرار لكن فجأة بدأت تحصل قفزات في سعر الدولار والسبب ببساطة وضحته بيانات البورصة المصرية واللى كشفت عن مبيعات كبيرة للأجانب في أذون الخزانة المصرية، خلال تعاملات الأيام الأخيرة بسبب زيادة الاضطرابات الجيوسياسية على خلفية اغتيال رئيس المكتب السياسي لحركة حماس إسماعيل هنية في إيران، ومزاعم الجيش الإسرائيلي بمقتل قائد كتائب القسام محمد الضيف، في غارة جوية الشهر اللى فات.. ومن بعدها التهديدات الايرانية وتهديدات حزب الله بالرد الموجع على اغتيال هنية
يعنى ببساطة كده تقدر تقول ان اصحاب الموال الساخنة اللى بيستثمروا فلوسهم فى أدوات الدين الحكومية ومنها أذون الخزانة بدأوا ياخدوا فلوسهم ويخلعوا خوفا من توسيع نطاق الصراع فى الشرق الأوسط والأخطار اللى ممكن تواجه استثماراتهم
وعكس الاتجاه السائد من وقت تعويم الجنيه الأخير في شهر مارس اللىف ات، اتجه المستثمرين الأجانب إلى البيع في أذون الخزانة المصرية خلال الأسبوع اللى فات ، وسجلت تعاملاتهم صافي بيع بقيمة 14.46 مليار جنيه مايوازي (297 مليون دولار)، بحسب بيانات البورصة المصرية.. وده مؤشر سلبي بيدي انطباع ان ممكن تحصل أزمة جديدة
ووفقا لارقام غير رسمية المستثمرين خلال شهر يونيو الأجانب تخارجوا من السوق بحوالي4 مليار دولار حصيلة بيع أذون الخزانة المصرية اللى كانوا بيمتلكوها.
وخلال الأسبوع اللي فات ارتفع سعر صرف الدولار في البنوك المصرية إلى أعلى مستوياته منذ تعويم الجنيه المصري في مارس مسجلاً مستوى 48.72 جنيه وبيقترب بقوة من مستوى 49 جنيه.. وطبعا تحرك سعر الدولار في السوق كان نتيجة مباشرة للمبيعات الكبيرة في أذون الخزانة المصرية، على الرغم من أن صافي الأصول الأجنبية لا يزال عند مستويات جيدة مقارنة بالفترة السابقة للتعويم، حيث سجل 14.8 مليار دولار مقابل عجز بأكثر من 29 مليار دولار.
وبلغت استثمارات الأجانب في محافظ الأوراق المالية أو ما يعرف بشكل شائع بـ "الأموال الساخنة" 35.5 مليار دولار بنهاية يونيو الماضي.
