اقترب من 50 جنيه.. مصير الدولار فى مصر الأيام الجاية
يا ترى ايه اللي بيحصل فى سوق صرف العملات الأجنبية فى مصر؟ وليه الدولار سعره اقترب من 50 جنيه ؟ والتوقعات بتقول ايه عن سعر العملة الأمريكة فى مصر خلال الشهور الجاية؟
بعد ساعات قليلة من اعلان صندوق النقد الدولى اتمام المراجعة التالتة لبرنامج مصر الاصلاحي تمهيدا لصرف شريحة جديدة من قرض الـ 8 مليار دولار بقيمة 820 مليون دولار قفز سعر الدولار فى البنوك بحولى 20 قرش مرة واحدة ووصل الى حدود 49 جنيه وماشي واحدة واحدة ناحية الوصول الى 50 جنيه
فيا ترى ايه اللى بيحصل فى سوق صرف العملات ؟
بص يا سيدي صندوق النقد الدولى طلع بيان بعد الموافقة على المراجعة التالتة لبرنامج مصر وطالب الحكومة المصرية بانها ترفع اى قيود فيما يتعلق بمرونة سعر الصرف ويحرر سعر الجنيه قدام العملات الأجنبية بشكل كامل .. والنقطة دي تحديدا فى بيان الصندوق عملت شوية بلبلة وناس كتير استغلتها غلط وبدأت تطلع اشاعات ان مفيش تعويم كامل للجنيه وان سعر الدولار فى البنوك مدار وان احتمال يكون فيه تعويم جديد الفترة الجاية .. وده كان سبب قوى من اسباب ارتفاع الدولار النهاردة فى البنوك وشركات الصرافة بالتزامن مع طلب متزايد على العملة الأمريكية لتلبية طلبات الاستيراد من الخارج
طب هل الكلام والاشاعات دي حقيقية؟
بص يا سيدي من يوم 6 مارس اللى فات البنك المركزي وبشهادة كل مؤسسات التمويل الدولية بيطبق سعر صرف مرن للجنيه وده اللى خلا سعر الدولار يرتفع فى البنوك من 31 الى اكتر من 50 جنيه ونزل بعدها لحدود 47 جنيه وطالع نازل ما بين 47 و48 جنيه والنهاردة اقترب من 49 جنيه يعنى احنا هنا بنتكلم على سعر مرن بيخضع للعرض والطلب بيرتفع لما الطلب يزيد وبينزل لما العروض من العملة الأمريكية بيزيد
طب ايه توقعات الدولار فى مصر الأيام الجاية؟
لازم نكون عارفين ان سعر صرف مرن معناه ان ش هيكون فيه ثبات ابدا لسعر الجنيه امام الدولار وبالتالى اللى بيحصل فى سوق الصرف اليومين دول عادي جدا وهيحصل زيه كتير الفترة الجاية شوية الدور هيرفع وشوية هينزل وهكذا واللى هيتحكم فى الموضوع هو نجاح الحكومة فى توفير مصادر للنقد الجنبي سواءؤ من خلال الاستثمار الأجنبي المباشر او زيادة الصادرات والسياحة ونمو تحويلات قناة السويس او من خلال برنامج الطروحات الحكومية واللى هتدخل للبلد عملة صعبة نتيجة بيع حصص فى الشركات المملوكة للدولة لصناديق استثمار عربية وأجنبية
