هتوفر مليارات الدولارات.. خريطة الاكتشافات الجديدة لآبار البترول

 
زيادة انتاجية البترول واكتشاف ابار جديدة هو الشغل الشاغل للحكومة دلوقتي، خصوصا ان مصر عندها نقص كبير في الغاز الطبيعي والوقود اللي الدولة بتستخدمه في تشغيل محطات توليد الكهرباء.. ياتري الدولة هتعمل اية علشان تزود انتاجها من البترول وشغالين علي اية حاليا

مصر من فترة طويلة عندها نقص شديد في انتاج البترول، وده خلي الحكومة تلجا لاستيراد كميات كبيرة من الوقود اللي محطات توليد الكهرباء عايزاه علشان تتشغل بيه لانتاج التيار الكهربائي، خصوصا أن وزارة الكهرباء اعلن ان تخفيف الأحمال لمدة يوم واحد بتوفر ما يقرب من 600 مليون دولار هتخيل بقي التكلفة الكبيرة اللي بتتحملها الحكومة علشان توفر الوقود اللازم لتشغيل محطات توليد الكهرباء 
طيب اية اللي بتعمله الدولة علشان تزود انتاج البترول والحقول البترولية؟.
المهندس خالد موافى رئيس شركة بتروبل، قال الشركة عندها 14 فرصة متاحة للاستكشاف بإجمالى احتياطى 55 مليون برميل، ومخطط حفر بئرين استكشافيين بمنطقة جنوب فيران باحتياطى هيوصل لـ 4 مليون برميل، ده غير منطقة تانية باحتياطى 4 مليون برميل وبمعدل إنتاج هيوصل لـ 2000 برميل يوميا.
رئيس شركة بتروبل قال كمان أن حقول الزيت بسيناء حصل لها تقادم خصوصا أنها شغالة من أكثر من 70 سنة، وكان لازم وجود حلول غير تقليدية للتنمية،وحاليا الشركة شغالة علي مجال تنمية الخزانات غير التقليدية فى الإنتاج ذات النتؤات باحتياطى متبقى هيوصل لـ 5ر10 مليون برميل.
موافي قال كمان أن خطة تغلب الشركة على التراكيب الجيولوجية المعقدة فى خليج السويس والإنتاج وده هيحصل عن طريق زيادة الإنتاج المحلى من الثروة البترولية زي الزيت الخام والغاز الطبيعى وهيتم الإسراع في عمليات تنمية الآبار الجديدة المكتشفة علشان هيتم وضعها على خريطة الإنتاج وتكثيف أعمال البحث والاستكشاف فى مناطق مصر البرية والبحرية.

طيب الشركة هتحقق الاكتشافات دي أزاي؟.
رئيس شركة بتروبل قال أن الشركة حاليا شغالة علي جذب استثمارات جديدة فى مجال البحث والاستكشاف والطاقات الجديدة كالهيدروجين علشان يحصل تأمين واستدامة إمدادات الوقود للسوق المحلية، خصوصا أن مصر حاليا بتسعي لتنويع مصادر الطاقة المستخدمة، ده غير استكمال المشروعات الكبيرة فى مجال التكرير زي مشروع تعظيم إنتاج السولار بأسيوط.
وعلشان نكون عارفين كمان، أن الدولة حاليا شغالة علي موضوع زيادة الفرص الاستثمارية للبحث عن البترول والغاز وإنتاجه باستخدام التقنيات الرقمية وتوفير وتيسير الإجراءات المحفزة لزيادة الاستثمارات، ده غير تعظيم القيمة المضافة من الموارد البترولية والغاز وخصوصا فى صناعة البتروكيماويات وتشجيع القطاع الخاص على تعظيم مشاركته مع قطاعى البترول والتعدين.
الخطة الجديدة للحكومة المصرية قايمة علي تحويل مصر لمركز رئيسى فى أفريقيا والشرق الأوسط ومنطقة البحر الأبيض المتوسط كمصدر رئيسي للطاقة ومركز لتبادل بين كل دول العالم .