الحكومة مش هي السبب.. شوف الدولة هتزود أسعار الكهرباء ليه

أيام قليلة قوي وهيكون المصريين مع صدمة جديدة بعد زيادة أسعار السولار والبنزين بخصوص أسعار شرائح الكهرباء الجديدة واللي مجلس الوزراء هيعتمدها خلال ساعات... يا تري اية اللي هيحصل في الأسعار .. والزيادة هتكون كام 
 
في غضون ساعات قليلة قوي، مجلس الوزراء هيعتمد زيادات جديدة في أسعار شرائح الكهرباء واللي رفعتها وزارة الكهرباء والطاقة المتجددة واللي أعدها جهاز تنظيم مرفق الكهرباء وحماية المستهلك عن الخدمة التسعير الجديدة للشرائح.
طيب اية اللي هيحصل في الأيام اللي جاية في الكهرباء ؟.
الأيام اللي فات لجنة تسعير المواد البترولية اعتمدت الزيادات الجديدة في أسعار البنزين والسولار واللي بدأ العمل بيها من يوم الخميس اللي فات، وحاليا جه الدور علي الكهرباء.. ووزارة الكهرباء والطاقة المتجددة رفعت الخدمة الجديدة لتسعير الشرائح الجديدة واللي هتوصل فيها الزيادة ل 30% عن الاسعار اللي لسه الوزارة شغالة لحد اللحظة دي، وفي حالة ساعات قليلة قوي الحكومة هتعلن عن اعتماد الأسعار الجديدة للشرائح .
وعلشان تكون عارفين أن الأسعار الجديدة لشرائح الكهرباء كان المفروض أن الدولة هتبدا تطبيقها بداية من شهر يوليو الحالي بس أزمة تخفيف الاحمال واستمرارها وقطع الكهرباء اللي كان بقطع علي الناس خلي الدولة تقرر تعيد حساباتها في موعد التطبيق، وخلاص الدولة خلصت من أزمة تخفيف الاحمال وانتهت تماما وهتفضل الأزمة منتهية لحد نصف شهر سبتمبر اللي جاي يعني مفيش داعي تاني لتأجيل الزيادة وكمان ده كان بند مهم قوي من البنود اللي طبلها صندوق النقد الدولي في الحاجات اللي حددها لمصر علشان خطة رفع الدعم التدريجي وحاليا الدولة مستمرة تطبيق الخطة بشكل تدريجي في رفع الدعم عن كل القطاعات بما فيهم قطاع الكهرباء .
طيب ليه الدولة هترفع الدعم عن قطاع الكهرباء وسعر الكيلووات علي الدولة بيوصل لكام؟.
تكلفة سعر الكيلووات ساعة على الدولة حاليا بيوصل ل 223 قرشًا، والمواطن بيشتريه ب58 قرشًا في الشريحة الأولى وبيوصل متوسط دعم الدولة لكل كيلو وات ساعة في كل مختلف الشرائح إلى جنيه كامل وده يعتبر رقم كبير جدا مقارنة بعد العدادات علي مستوي الجمهورية، خصوصا أن بعد الزيادات الكبيرة اللي حصلت في أسعار الوقود والغاز الطبيعي والمازوت اللي الدولة استوردهت مؤخرا علشان تشغل محطات توليد الكهرباء علشان ميكونش عندنا أزمة تخفيف احمال.
الدولة برضوا عملت لفتة حلوة قوي، وهيا أنها راعت في الزيادات الجديدة لشرائح الكهرباء محدودي ومتوسطي الدخل خصوصا في الثلاثة شرائح الاولي واللي بيحصلوا علي اعلي دعم في قطاع الكهرباء والزيادة فيهم مش هتكون كبيرة قوي مراعاة للبعد الاجتماعي التخفيف علي المواطنين.
طيب أسعار شرائح الكهرباء الحالية بتوصل لكان قيل تطبيق الزيادة ؟.
الشريحة الأولى: من 0 إلى 50 كيلو وات سعرها بيوصل ل58 قرش والشريحة الثانية: من 51 إلى 100 كيلو وات سعرها بيوصل ل 68 قرش والشريحة الثالثة: من 101 إلى 200 كيلو وات سعرها بيوصل ل 88 قرش والشريحة الرابعة: من 201 إلى 350 كيلو وات سعرها بيوصل ل 108 قرش والشريحة الخامسة: من 351 إلى 650 كيلو وات سعرها بيوصل ل 138 قرش والشريحة السادسة: من 651 إلى 1000 كيلو وات سعرها بيوصل ل 158 قرش والشريحة السابعة والأخيرة واللي هيا أكثر من 1000 كيلو وات سعرها بيوصل ل 178 قرش.