بعد رفع أسعار السولار.. خطة منع تكرار أزمة تخفيف الاحمال
![البنزين]( /UploadCache/libfiles/5/7/600x338o/207.jpg)
وزارة الكهرباء والطاقة المتجددة بدأت تاخذ اجراءات مشددة علي الناس اللي منورة بنظام الممارسة وفي الايام اللي جاية هيحصل تغير جذري في نظام الانارة لهم.. يا تري الحكومة ناووية تعمل اية للناس اللي منورة بنظام الممارسة وخاصة بعد ارتفاع اسعار المواد البترولية.. وهل الدولة فعلا هتقطع النور عليهم خالص ولا اية الدنيا
الشغل في قطاع الكهرباء مش بيخلص خصوصا ان الدولة كلها مشغولة في الوقت الحال بخطة تخفيف الاحمال وهل الدولة هترجع تقطع الكهرباء علي الناس تاني ولا الدنيا هتفضل منورة ولا هنعيش في العتمة تاني، وهنرجع لايام العيشة جنب اللمبة الفلاحي بتاع زمان.
ومن شوية صدرت قرارات لجنة تسعير المواد البترولية واللي رفعت بمتوسط جنيه ونص وامبارح كان فيه اجتماع مهم جدا بين الرئيس عبدالفتاح السيسي مع الدكتور محمود عصمت وزير الكهرباء والطاقة المتجددة، والرئيس اكد علي وزير الكهرباء علي اهمية تامين التغذية الكهربائية للشعب علشان ميبقاش فيه تخفيف احمال تاني ولا الكهرباء تقطع علي البيوت مرة تانية، والرئيس كلف وزير الكهرباء التوسع في محطات انتاج الكهرباء وخصوصا المحطات اللي شغالة في مجال انتاج الطاقة النظيفة من الرياح والطاقة الشمسية خصوصا انها المستقبل ومتماشي مع خطة الدولة لخفض الانبعاثات الكربونية وخفض استهلاك الوقود الاحفوري من الغاز الطبيعي والمازوت اللي محطات توليد الكهرباء .
طيب اية اللي حصل بعد اجتماع وزير الكهرباء مع الرئيس عبدالفتاح السيسي؟.
بعد اجتماع وزير الكهرباء مع الرئيس عبدالفتاح السيسي، وزير الكهرباء طلع علي الاجتماع الاسبوعي لمجلس الوزراء والكلام في المجلس علي قطاع الكهرباء وخطة عمل الوزارة في الايام اللي جاية مبيخلصش، ووزير الكهرباء والطاقة المتجددة، عرض خلال المجلس خطة التعامل ومواجهة نسبة الفقد وسرقات الكهرباء الموجودة واللي نسبتها كبيرة علي الشبكة القومية للكهرباء.
وزير الكهرباء قال لرئيس مجلس الوزراء، أن نسبة السرقة في الكهرباء بقت مرتفعة جدا وحاليا طرق سرقة التيار بقت متطورة ومختلفة ومبقتش زي زمان لما كان الناس بتوصل سلك من وراء العداد علشان تنور لمبة ولا تشغل سخان ولا تشغل تكييف، لا دلوقتي في طرق جديدة حصلت في سرقة الكهرباء، واللي عايز يسرق كهرباء من هو لسه بيأسس شقة بيعمل طريقة يسرق بيها كهرباء وغالبا السرقة بتكون بعيدة جدا عن العدادات ويبقي صعب جدا علي رجال شرطة الكهرباء انهم يكشفهوا بسهولة ، ووصل بهم التطور في سرقة الكهرباء أنهم يوصلوا كهرباء بالسرقة في العدادات مسبوقة الدفع واللي المفروض انهم تكشف سرقة الكهرباء
طيب اية هيا تكليفات رئيس الوزراء لوزير الكهرباء والطاقة المتجددة؟.
رئيس الوزراء طالب وزير الكهرباء بوقف تشغيل نظام الممارسة في الأنارة في البيوت خصوصا ان في بيوت دلوقتي بتبقي عايزة تنور بنظام الممارسة علشان تنور وتشغل تكييفات ومراوح وتعمل اللي هيا عايزة لانهم عارفين انهم هيدفعوا رقم معين كل اخر شهر وخلاص سواء بقي شغل البيت كله نور ولا نور لمبة واحدة، والدكتور مصطفي مدبولي رئيس مجلس الوزراء وجه وزير الكهرباء بالغاء العمل بنظام الممارسة في استهلاك الكهرباء وتركيب عدادات كودية لكل البيوت بلا استثناء سواء بقي كان صادر لها قرارات تصالح ولا هيحصل لها هدم.