مش الزيادة الأخيرة.. مفاجآت 2025 عن أسعار البنزين والسولار.. لسه التقيل جاي
![بنزين]( /UploadCache/libfiles/5/7/600x338o/199.jpg)
يا ترى الزيادة اللى حصلت فى اسعار البنزين والسولار النهاردة هي الأخيرة ولا لسه فيه زيادات تانية؟ ولو فيه زيادات هتكون امتى وكام ؟ وليه الحكومة بترفع ايدها عن دعم الوقود والطاقة؟
زي ما كلنا تابعنا فى الساعات الأخيرة الحكومة ممثلة فى وازرة البترول أعلنت عن زيادات جديدة فى اسعار البنزين والسولار بنسب وصلت الى 15% في خطوة اعتبرها كتير من المحللين والمراقبين محاولة من الحكومة لتمرير المراجعة التالتة من قرض ال 8 مليار دولار مع صندوق النقد الدولي
بس يا ترى هل الزيادة اللى أقرت هي الأخيرة ولا لسه التقيل جاي؟
بص يا سيدي .. عشان تفهم اللى بيحصل فى ملف الطاقة واسعار الوقود.. لازم تعرف فى الاول .. ان مصر موقعة اتفاق على برنامج تمويل مع صندوق النقد الدولي بقيمة 8 مليار دولار وعشان الصندوق يوافق يدي مصر المبلغ ده طلب من الحكومة خطة اصلاح لسد العجز فى الموازنة العامة وكمان عشان يضمن الالتزام بسداد غالقرض مستقبلا .. والحكومة بالفعل قدمت برنامج اصلاح شامل كان من بين بنوده تخفيض الدعم بشكل تدريجي عن الوقود والمحروفات بشكل عام بالاضافة كمان الى رفع الدعم عن الكهربا .. والصندوق وافق على خطة مصر بس عشان يديك القرض قسمه لشرايح وكل شريحة مرتبطة بتنفيذ مطالب فكان لازم الحكومة ترفع اسعار البنزين والسولار عشان تقدر تكمل البرنامج وتصرف باقي الشرايح وفق الجداول الزمنية المحددة
نرجع لأهم سؤال .. هل فيه زيادات تانية في اسعار البنزين والسولار ؟
للأسف هيكون فيه زيادات تانية خلال الباقي من 2024 ولحد نهاية 2025 .. وزي ما كلنا بقينا عارفين لجنة تسعير المواد البترولية بتجتمع كل 3 شهور للبت فى الأسعار سواء بتبيتها أو رفعها .. لكن التوقعات كلها رايحة فى سكة رفع أكتر من مرة فى الشهور الجاية وده اللى أكده رئيس الحكومة بنفسه لما قال ان هيكون فيه رفع تدريجي لأسعار الوقود وان الدولة مش هتقدر تتحمل فرقة التكلفة بين السعر الحقيقي للبنزين والسولار والسعر اللى كان بيتباع بيه للمستهلك .. وئيس الوزراء قال خلال سنة ونص هنزود تدريجي بشكل يعمل توازن ومصطلح توازن كان رئيس الوزراء وضحه الشهر اللى فات وهو ان البنزين يبقي مربح للدولة بحيث تقدر تدعم السولار؛ يعني مصر بتبيع يومي 25 مليون لتر بنزين تكسب منهم بحيث تقدر تدعم 40 مليون لتر سولار
طب الزيادات الجاية فى اسعار البنزين ممكن تحصل امتى؟
وفقا للجداول الزمنية لاجتماعات لجنة التسعير النقدي هيكون فيه حوالى 6 اجتماعات من دلوقتى لغاية نهاية 2025 وفى كل اجتماع من الاجتماعات دي هيتم تحريك الأسعار بنسب قليلة وتدريجية بحيث المواطن ما يحسش بالزيادة الكبيرة مرة واحدة والتوقعات بتقول ان الزيادة فى كل مرة بتتراوح بن جنيه ونص و2 جنيه وصولا الى 3 جنيه فى اللتر الواحد فى اخر اجتماعات 2025