تفاصيل الأسعار الجديدة لشرائح الكهرباء وموعد إعلانها
![عداد كهرباء]( /UploadCache/libfiles/5/7/600x338o/141.jpg)
واضح أن الكلام علي الكهرباء مش هيخلص وهنطلع من مشكلة هنروح للي اكبر منها، يا دوب خلصنا من أزمة تخفيف الاحمال دخلنا إلي أسعار شرائح الكهرباء الجديدة.. يا تري أمتي موعد إقرارها والزيادة الجديدة هتوصل لكام
مفيش أقل من 48 ساعة فاتت علي اعلان وزاره الكهرباء والطاقة المتجددة انتهاء أزمة تخفيف الاحمال علي الشبكة القومية للكهرباء، الا لما بدأت تظهر مشكلة جديدة برضوا في قطاع الكهرباء وهيا الأسعار الجديدة لشرائح الكهرباء للقطاعين المنزلي والتجاري .
طيب اية اللي هيحصل في موضوع زيازة أسعار شرائح الكهرباء ؟.
قولنا لحضراتكم هنا في بانكير أكثر من مرة أن الدولة قررت تأجيل الزيادة اللي كانت مقررة من شهر يناير من سنة 2024 زيادة أسعار شرائح الكهرباء للقطاعين المنزلي والتجاري في شهر يونيو، وقولنا لحضراتكم كمان ليه الدولة أحلت تطبيق الزيادة الجديدة في أسعار الشرائح واللي كانت بسبب أزمة تخفيف الاحمالخ خصوصا أن الدولة شافت أن المواطن مش هيتقبل زيادة جديدة في أسعار شرائح الكهرباء واصلا هيا مش موجودة .
طيب اية اللي جد دلوقتي وخلي الدولة تفتح موضوع زيادة أسعار شرائح الكهرباء تاني؟.
اللي جد دلوقتي هو اعلان الدولة إنتهاء خطة تخفيف الاحمال بشكل رسمي وبالتالي مفيش وقت الدولة تأجيل تاني زيازة أسعار الشرائح خصوصا أن وزارة الكهرباء والطاقة المتجددة عليها ديون كتيرة جدا لوزارة البترول والثروة المعدنية ودي فلوس اللي الكهرباء اخذت بيها وقود وغاز طبيعى ومازوت علشان تشغل محطات توليد الكهرباء، والبترول طالبت بيها الكهرباء أكثر من مرة .
مصادر بوزارة الكهرباء والطاقة المتجددة قالت أن الزيادات الجديدة المرتقب الإعلان عنها هتتراوح فى الشرائح الثلاثة الأولى بنسبة من ٣٠ إلي ٣٥٪ وباقي الأربع شرائح التانيين الزيادة هتختلف فيهم بين شريحة والتانية ومش هتعدي الزيادة الجديدة 40%، وان الزيادة الجديدة جاية نتيجة الأعباء الاقتصادية اللي علي وزارة الكهرباء والطاقة المتجددة علشان سداد التزاماتها لوزارة البترول والثروة المعدنية.
المصادر كملت كلامها وقالت إن قرار الدولة بتاحيل زيادة أسعار بيع الكهرباء لأكثر من مرة تسبب في حدوث فجوة مالية بين سعر التكلفة وسعر البيع، وأن الدولة لسه هدفها عدم تحميل المواطن البسيط أعباء مالية إضافية خصوصا مع الظروف الاقتصادية اللي بيمر بها العالم وعلشان كده الدولة اضطرت أنها تطبيق خطة تخفيف الاحمال بدلًا من زيادة الأسعار
المصادر قالت كمان أن تكلفة سعر الكيلووات ساعة علي الدولة حاليا بعد تحريك سعر الصرف بيوصل ل 223 قرشًا، والمواطن بالشريحة الأولى بيحاسب على سعر الكيلووات ساعة بـ58 قرشًا وكده الدولة بتتحمل 74% من قيمة فاتورة استهلاك المواطن، ومتوسط النسبة اللي الدولة بتتحملها في باقي الشرائح بتوصل لجنية كامل وجه الوقت اللي الدولة تبدأ تخفض الدعم خصوصا مع الارتفاع العالمي في أسعار الطاقة والمحروقات بسبب الظروف السياسية الأخيرة .
طيب أمتي الزيادة الجديدة في أسعار شرائح الكهرباء هتتطبق؟.
وزارة الكهرباء والطاقة المتجددة رفعت خطة تسعير شرائح الكهرباء الجديدة لمجلس الوزراء في شهر يونيو اللي فات علشان المجلس يقول رأيه عليها، ومجلس الوزراء قرر تأجيل إعلان الزيادة الجديدة في أسعار شرائح الكهرباء بسبب أزمة تخفيف الاحمال، وحاليا مجلس الوزراء بصدد أنه يعمل مؤتمر صحفي لاعلان عم اعتماد الزيادة الجديدة في الأسعار خصوصا أن الدولة دفعت ارقام كبيرة جدا في الفترة إلي فاتت علشان تستورد وقود لتشغيل محطات توليد الكهرباء وتنتهي أزمة تخفيف الاحمال واللي كانت مشكلة لكل الشعب المصري خصوصا أن الوقت الحالي الدولة بتمر بارتفاع كبير في درجات الحرارة وبالتالي محدش هيقدر يستغني عن النور أو المروحة أو التكييف للتخفيف من حرارة الجو .