البانيه نزل 50 جنيه.. أسعار الفراخ "رايحة على فين" الفترة اللي جاية؟
يا ترى إيه سر انخفاض سعر البانيه 50 جنيه مرة واحدة.. في ظل عدم استقرار سعر الفراخ في السوق، وهل الأسعار دي هتثبت على كده ولا هترتفع تاني.. وسوق الدواجن في مصر رايح على فين الفترة اللي جاية.. هنقولك الحكاية بالتفاصيل في الفيديو ده.
يوميًا، كتير من المصريين بيدوروا على جوجل، على أسعار الدواجن، لأن اللحمة بتعتبر طبق دايم على السفرة المصرية.
وفي الأيام الأخيرة، أسعار الدواجن في مصر شهدت انخفاض ملحوظ، وده اعتبره كتير من الخبراء في صناعة الدواجن، أنه أمر طبيعي بعد انتهاء عيد الأضحى المبارك، لأن المواطنين عندهم مخزون كافي من اللحوم الحمرا.
لكن انهاردة تحديدًا، انخفضت أسعار الدواجن البيضا، ووصل سعر الكيلو في المزرعة 70 جنيه بعد ما كان ب 97 ، وفي المحلات انهاردة سجل 75 جنيه.
وبالنسبة للفراخ الأمهات، فسعرها انخفض لـ62 جنيه للكيلو بعدما وصل ل 70 من أيام قليلة.
كمان، انخفض سعر كيلو الفراخ الساسو أو "الفراخ الحمرا" وسجل 105 جنيه، عشان توصل للمستهلك بسعر 120 جنيه .
أما الفراخ البلدي، فهي كمان انخفضت أسعارها عشان تسجل 118 جنيها ، بعدما وصل سعرها ل 120 جنيها.
ولعشاق البانيه، انهاردة سعر كيلو البانيه سجل 180 جنيه في بعض المحلات بعد ما كان سعره وصل 230 جنيهًا من أيام قليلة.. يعني انهاردة سجل انخفاض حوالي 50 جنيه.
وكمان كيلو الأوراك، بيتراوح سعره بين 70 و 85 ، والكبد والقوانص بين 90 و 120 جنيه للكيلو، والأجنحة يتراوح سعرها بين 70 و 80 جنيها.
طب بالنسبة لأسعار البيض.. انخفضت هي كمان، وسجل سعر كرتونة البيض الأحمر من 139 لـ 142 جنيهًا، وكرتونة البيض الأبيض من 134 لـ 139 جنيهًا.
الخبراء حللوا سر انخفاض أسعار الدواجن دلوقتي، وقالوا إنه بيرجع لضعف الطلب عليها، وده أدى إلى تراجع أسعارها بنسبة 30%، وأوضحوا كمان أن تراجع الأسعار بيؤثر سلبا على مربي الدواجن في ظل إرتفاع تكاليف الإنتاج.
أما عن توقعات الأسعار في الفترة اللي جاية، فمتوقع أنها ترتفع في ظل ارتفاع درجات الحرارة وتأثير عملية تخفيف أحمال الكهرباء على إنتاج المزارع.
