لغز ارتفاع الدولار أمام الجنيه النهاردة.. مفاجأة من العيار التقيل

 
 
ياترى ليه الدولار رجع يزيد تاني قدام الجنيه المصري وهل فيه أزمة في المعروض النقدي وتأثير ده على التضخم وارتفاع الأسعار في الفترة الجاية.. تعالوا نشوف التفاصيل في الفيديو ده خليكم معانا للآخر .

 
النهاردة الدولار رفع على غير العادة في أول التعاملات وتراوحت الزيادة بين 9و13 قرش وسجل 48.33 جنيه وبيقترب من حاجز ال49 جنيه وعشان نفهم ليه الدولار بيزيد لازم نعرف إنه هو نفس السبب اللي بيخليه ينزل وهو قانون العرض والطلب لأن سوق العملة حر دلوقتي بعد قرار البنك المركزي المصري بتحرير سعر الصرف أو التعويم وبقي السوق بس هو اللي بيحدد السعر وممكن في اخر التعاملات تلاقي سعره نزل تاني ولو تابعنا معدلات الزيادة والانخفاض في سعر الدولار هتلاقيه بيتراوح بين 47.50 و48.50 ومخرجش من السعر ده في أقصى ارتفاع ليه من فترة.
طيب ليه الدولار زاد نهاردة؟ 
زي ماقلنا لحضرتك طالما السعر بيزيد يبقي فيه طلب اكبر على العملة الأمريكية سواء من المستوردين أو أصحاب الشركات أو سحب اكتر من الدولة لسداد فاتورة الاستيراد او اقساط الديون أو سداد مستحقات الشركات العالمية في مصر لكن دا ظاهرة بتحصل عادي في أوقات معينة وخاصة في ضوء تقارير بتتكلم  أن الدولار هينخفض بشكل كبير الفترة الجاية وهيستقر في حدود 43و46 جنيه وفيه تقارير بترجح يستقر السعر في حدود 67 جنيه مع استمرار التدفقات النقدية الدولارية واللي انتعشت الفترة اللي فاتت خاصة من قطاع الاستثمار المباشر وغير المباشر ومن السياحة والتصدير ومن خطو ترشيد الاستيراد بالتزامن مع اتساع خطة توطين الصناعة الأجنبية وتوفير البديل المحلي.
كمان فيه أسباب تانية خارجية الخبراء شايفين إنها ممكن تكون سبب في ارتفاع سعر الدولار منها التوترات الجيوسياسية بمنطقة الشرق الأوسط واتساع نطاق التوتر بالمنطقة زي ماشفنا في الساعات الأخيرة وتراكم الطلب على الدولار بسبب أجازة البنوك، في نفس الوقت  أشار الخبراء إلى منافسة البنوك على جذب مدخرات المليونيرات عبر طرح شهادات ادخار مرتفعة العائد بحد أدنى مليون جنيه، ده كانت نتيجته جمع جزء من حصيلة تنازل المصريين عن الدولار في البنوك وشركات الصرافة.
كمان الخبراء شايفين إن أحد أسباب ارتفاع الدولار في مصر هو التأثر بارتفاع  سعر العملة الأمريكية عالميا أمام العملات الأجنبية ومنها الجنيه المصري بسبب تزايد الإقبال عليه نتيجة التوترات اللي قلنا عليها وده خلي فيه زيادة على الطلب على الدولار في السوق المحلي.
في كل الأحوال السوق المصرفي لسه تحت السيطرة واللي بيحصل ده نتيجة طبيبعية لسياسات السوق والموضوع كله مرهون بااللي تقدر توفره الدولة من المعروض النقدي بشكل مستمر ولغاية دلوقتي الحكومة ناجحة في ده والأرقام بتقول إن مصر بقت مركز جذب استثماري في المنطقة وهتستقبل مليارات الدولارات خاصة في الاستثمارات المفتوحة في الساحل الشمالي والمنطقة الاقتصادية لقناة السويس..
كمان تأثير ارتفاع الدولار مش هيكون ليه تأثير على ارتفاع اسعار السلع لأن زي ماقلنا الدولار رفع بس مخرجش عن التوقعات ولا عمل قفزات تخوف.