ليه المونوريل دلوقتي.. هيعود على المواطن البسيط بإيه؟.. اعرف الحكاية بالتفصيل
![مونوريل]( /UploadCache/libfiles/5/7/600x338o/24.jpg)
يا ترى ليه الحكومة بتعمل مونوريل دلوقتي في ظل أن الوضع الاقتصادي مش أحسن حاجة، والمشروع ده هيعود على المواطن البسيط بإيه، وهل فعلا هيكون مواصلة لكل فئات الشعب ولا لفئة معينة.. هنقولك الحكاية بالتفاصيل في الفيديو ده.
يوم الأربعاء اللي فات، الفريق كامل الوزير نائب رئيس الوزراء ووزير النقل والصناعة، كان ضيف لأحد البرامج التلفزيونية، واتوجه له سؤال صريح وواضح، وهو: (ليه المونوريل دلوقتي.. والمواطن البسيط هيستفيد منه إيه؟ في ظل أنه عنده أزمة في العيش وغيرها) .
ورد الوزير، وأكد أن الحكومة المصرية ممثلة في وزارة النقل، بتنفيذ مواصلات جديدة عشان تسهل حياة المواطنين، ومن ضمنها مشروع المونوريل، اللي هيخدم مدن زي 6 أكتوبر والعاصمة الإدارية الجديدة، وأكد كمان أن الهدف من المونوريل في 6 أكتوبر، هو إن المدينة دي رغم أنها قلعة صناعية وعلمية كبيرة، إلا انها لحد دلوقتي ملهاش أي وسيلة مواصلات جماعية، لذلك تم التفكير في إنشاء مونوريل لها.
الفريق كمان قال إن مونوريل 6 أكتوبر هايخدم المنطقة الصناعية هناك، بعد كه هيمر بكل أحياء المدينة وينتهي خط سيره في محطة وادي النيل في المهندسين، وبالتالي الراكب من هنا يقدر ينزل وياخد المترو عشان يوصل قلب القاهرة، أو ممكن بعدها ياخد مونوريل شرق النيل، واللي هو خط العاصمة الإدارية ويوصل لأي مكان هو عايزه.
ومونوريل العاصمة الإدارية هو كمان زي ما قال الوزير، بيبدأ من مدينة نصر مرورا بالقاهرة الجديدة ومناطق التجمع الخامس ثم هيستكمل رحلته لحد العاصمة الإدارية الجديدة.
طب ليه الوزارة عملت المونوريل اللي هو غالي؟ وماعملتش قطر كهربائي أو ال LRT،.. الإجابة زي ما قال كامل الوزير، لأن ال LRT محتاج أرض فاضية وعدم وجود تقاطعات مع مباني أو مرافق أو طرق أو غيرها، لأن ببساطة مسار المونوريل بيبقى منفصل، يعني أعلى سطح الأرض بدون تقاطعات.
وشدد كمان على أن في أسس فنية حتمت عليهم ينفذوا مونوريل مش قطر كهربائي في المنطقتين دول، لأن المونوريل هو وسيلة المواصلات الوحيدة اللي بتتواكب مع شوارع القاهرة الجديدة وكمان شوارع 6 أكتوبر.
كمان الوزير، أوضح كمان أن المونوريل هدفه زياد الاتصال بين المدن والمناطق العمرانية، وتسهيل حركة المواطنين، وتقليل استخدام السيارات الخاصة، وهذه النوعية من المواصلات تتسم بأنها وسائل نقل سريعة وعصرية وآمنة وصديقة للبيئة لنقل الركاب، وتوفر استهلاك الوقود، وتخفض معدلات التلوث البيئي.
وللي عايز يعرف المحطات والمناطق اللي هتستفيد من المونوريل، فبالنسبة لخط العاصمة الإدارية الجديدة، فهيبقي في 22 محطة، وهي: (الاستاد – هشام بركات – نوري خطاب – الحي السابع – المنطقة الحرة – المشير طنطاوي – كايرو فيستيفال – الشويفات – المستشفى الجوي – حي النرجس – محمد نجيب – الجامعة الأمريكية – إعمار – ميدان النافورة – البروة – الدائري الأوسطي – محمد بن زايد – الدائري الإقليمي – فندق الماسة – حي الوزارات – العاصمة الإدارية )، وبالتالي هيخدم كل الناس اللي ساكنه في المناطق دي
أما خط مونوريل السادس من أكتوبر، فمحطاته هي: (وادي النيل – الطريق الدائري – المريوطية – المنصورية ــ الطريق الصحراوي ( القاهرة /الاسكندرية ) - هايبر وان – جهينة - هيئة المجتمعات العمرانية – الحصري – دار الفؤاد – المنطقة الصناعية – القطار السريع).
وخطين المونوريل هينقلوا أكتر من 100 ألف راكب في الساعة الواحدة، ومن المقرر أنه يبدأ يشتغل في شهر أكتوبر المقبل كتشغيل تجريبي، وهيتشغل بالركاب خلال النصف الأول من العام القادم 2025.
وفي النهاية عزيزي المشاهد، قولنا: أنت كمواطن شايف انك هتسفيد من المونوريل ولا لأ؟