بعد قرار المركزي الأخير.. إيه اللى هيحصل فى مصر الأيام الجاية؟
![البنك المركزي المصري]( /UploadCache/libfiles/5/7/600x338o/19.jpg)
يا ترى ايه اللى هيحصل فى مصر الأيام الجاية بعد قرار البنك المركزي الأخير؟ وايه موقف الدهب والدولار ؟ وامتى ممكن الحكومة ترفع أسعار الكهربا والبنزين والسولار؟ وايه علاقة ده بصندوق النقد الدولي؟
يوم الخميس اللى فات وللمرة التانية على التوالى قررت لجنة السياسة النقديـة للبنك المركــزي في اجتماعهـا الإبقاء على سعري عائد الإيداع والإقراض لليلة واحدة وسعر العملية الرئيسية للبنك المركزي عند 27.25% و28.25% و27.75% على الترتيب. كما قررت الإبقاء على سعر الائتمان والخصم عند 27.75%.
قرا اللجنة كان متوقع وأغلب بنوك الاستثمار كانت شايفة ان المركزي المصري مش هيقدر يبدأ حاليا تخفيف قيود السياسة النقدية لأن التضخم حتى وان كان تراجع نسبيا فلسه فى حدود مرتفعة جدا كمان منتظر خلال الفترة الجاية تحريك أسعار الكهرباء والبنزين والسولار وكل دي مخاطر تخلى صناع السياسة النقدية بفكروا كتير قبل ما ياخدوا قرار تخفيض الفايدة
طب ايه اللى هيحصل بعد قرار المركزي الأخير ؟
من دلوقتى ولحد الاجتماع الجاى للجنة السياسة النقدية فى البنك المركزي هتفضل الأوضاع على ما هي عليه وصناع السياسة النقدية هيراقبوا ويتابعوا التطورات اللى هتحصل فى السوق وبناء عليه هتاخد القرارات المناسبة سواء بتثبيت اعار الفايدة أو خفضها أو حتى رفعها
ايوه زي ما سمعت كده ممكن لجنة السياسة النقدية ترجع تزود الفايدة تانى لو التضخم استمر فى مواصلة ارتفاعاته لكن وفقا لكتير من المؤشرات وحتى وفقا لتوقعات بنوك الأبحاث من المستبعد بشكل كبير رفع اسعار الفايدة فى مصر خلال الشهور الجاية لأن مؤشرات الاقتصاد بتتحسن وبيحصل تعافى فى كتير من القطاعات
طب والدهب والدولار رايحين على فين؟
نبدأ من الدهب بالتاكيد حضراتكم متابعين اللى بيحصل فى سو المعدن النفيس عالميا والاسعار اللى بتقفز قفزات كبيرة بسبب الانباء اللى طالعة عن بدء الفيدرالى خفض اسعار الفايدة فى الاجتماعات الجاية وفى مصر يمكن الاوضاع كانت مستقرة فى سوق الصاغة الشهور اللى فاتت لكن مؤخرا حصل تحريك فى الاسعار
أما بالنسبة للدولار فده اللى بيحكمه بشكل اساسي هو العرض والطلب يعنى لما المعروض من العملة الاامريكية بيزيد السعر بيقل والعكس صحيح لما بيحصل شح الدولار بيرفع وحاليا البنوك بتوفر الدولار للشركات والمستوردين وده اللى مخلى سوق الصرف هادي وان كان فى الايام الأخيرة وبسبب زيادة الطلب على العملة الأمريكية السعر اتحرك حبتين تلاتة