دهب ولا شهادات ادخار.. لو عاوز تشغل فلوسك استني المفاجأة لأخر النهار
![البنك المركزي المصري]( /UploadCache/libfiles/5/6/600x338o/949.jpg)
معاك سيولة مالية زيادة أو عندك مدخرات في البنوك وبتفكر تشغلها في حاجة تجيبلك مكاسب أكتر استني لغاية النهاردة وبعدها قرر.. ايه اللي هيحصل النهاردة وايه علاقة الشهادات الادخار بالدهب وايه مفاجأة المركزي المنتظرة.. تابعونا للنهاية وهنعرف التفاصيل كلها
فيه أنواع كتير من الاستثمار الشخصي لأصحاب المدخرات والفلوس الزيادة لكن أغلب المصريين بيفضلوا الاستثمار في الدهب يإما في شهادات الادخار في البنوك وكل واحد طريقته بتختلف في تشغيل فلوسه يعني اللي بيحطها في الدهب عارف إنه استثمار طويل الاجل مش أقل من 3 الي 5 سنين وبعدها بيفكر يبيع الدهب اللي اشتراه ويكسب مبالغ محترمة اما اللي بيستثمر في شهادات الادخار فدا بيدور على وسيلة سهلة وآمنة في نفس الوقت وفايدة معروفة يقبضها على حسب المدة اللي متفق بيها مع البنك والاستثمار في الشهادات ليه ميزة إنه مش مرهق ولا مقلق من أي تقلبات في السوق ومش عرضة للضياع أو السرقة زي الدهب مثلا ده غير إن البنك المركزي هو اللي بيضمن فلوس الشهادات.
طيب ايه اللي هيحصل نهاردة في المركزي؟..
معروف إن لجنة السياسة النقدية بالبنك المركزي هتجتمع النهاردة عشان تحسم مصير سعر الفايدة على الايداع والاقتراض في ضوء تقارير ونسب التضخم للفترة الاخيرة وخاصة في شهر يونيو اللي فات وبناء عليها هتطلع قراراها وأغلب الخبراء رايحين على احتمال تثبيت سعر الفايدة رغم انخفاض مؤشر التضخم لكن شايفين إن المركزي هيحافظ على السعر الحالي لضمان نزول أكبر في التضخم وفيه فريق تاني بيرجح خفض لجنة السياسة النقدية لسعر الفايدة بناء على انخفاض نسب التضخم والفريقين استبعدوا رفع سعر الفايدة لأنه مش منطقي مع المؤشرات الاقتصادية الأخيرة.
يعني بنتكلم في تثبيت أو تخفيض وهنا هنسأل عن مصير شهادات الادخار وخاصة اللي فايدتها عالية وبتوصل 27و30في المية واللي بتمثل عبء في التكلفة على البنوك وعشان كده طلع كلام كتير وتصريحات إن البنوك بتفكر تخفض النسبة دي مع تحسن الوضع الاقتصادي وعدم ارهاق البنوك وعلى فكرة احتمال تخفيض الفايدة وارد جدا لكن البنوك هتستني طبعا قرار المركزي النهاردة عشان تحسم موضوع نسبة الفايدة في الشهادات ذات العايد المرتفع وعشان كده بنقول لحضرتك استني النهاردة وشوف هتعمل ايه بفلوسك.
الاستثمار في الدهب دلوقتي هو الأفضل زي مابينصح خبراء السوق لان الاسعار العالمية في الطالع وهتستمر الفترة الجاية كلها في الزيادة وده هينعكس أو انعكس أصلا في اسعار الدهب في مصر فعلا وشفنا القفزات الكبيرة في سعر الدهب ووصل الذروة ب3300 جنيه لجرام 21 الأكتر شيوعا في مصر ومع التوقعات دي ناس كتير راحت تشتري المعدن الأصفر لأنه أمان وفي نفس الوقت الناس متابعة حركة تحليلات السوق ومع اتجاه المركزي لتثبيت سعر الفايدة سوق الدهب هيستمر في الصعود.