الدهب خرج عن السيطرة.. سعر عيار 21 صدمة
![الذهب]( /UploadCache/libfiles/5/6/600x338o/882.jpg)
إيه اللي بيحصل في سوق الدهب النهاردة.. وليه الأسعار خرجت عن السيطرة ومصير الأسعار في الايام الجاية.. كل ده هنعرفوا مع بانكير والتفاصيل في التقرير التالي.
النهاردة الدهب عمل مفاجأة صادمة وقفز سعر الجرام لأكتر من 80 جنيه مرة واحدة ووصل سعر جرام الدهب عيار 21 وده العيار الاشهر في مصر لسعر 3300 جنيه مرة واحدة ووصل سعر عيار 24 لحاجز3771 جنيه.. وسجل الجنيه الدهب 26.400 جنيه في أخر التعاملات.
طيب ليه الدهب سعره ضرب مرة واحدة؟.
فاكرين لما قلنا هنا في بانكير إن الدهب سعره هيقفز في الايام الجاية وكل التوقعات بتقول إن فيه فورة أسعار عالمية وعددنا وقتها الاسباب وقلنا إن اتجاه بنك الاحتياطي الفدراالي الامريكي لخفض سعر الفايدة وكمان اتجاه بنوك مركزية كتيرة لمزيد من شراء المعدن الاصفر وزيد على ده كله إن فيه أزمة أصلا في معروض الدهب عالميا وكل العوامل دي هتاخد أسعار الدهب للسحاب .
والنهاردة على سبيل المثال قفز السعر العالمي لـ2425 دولار ومتوقع يوصل 3000 دولار في الأيام والشهور الجاية وطبعا سوق الدهب المصري مرتبط بشكل مباشر بالاسعار العالمية وبسعر صرف الدولار وعشان كده حصلت القفزة في الاسعار داخل الصاغة من شوية .
كمان مع وصول الدهب عالميا لأرقام قياسية والتوقعات اللي لسه بتقول إن دي بدايات الارتفاع يبقي أكيد اللي جاي أصعب لو حضرتك بتسأل على مستقبل الاسعار وده لأن سعر الجرام في مصر واللي هو 3300 دلوقتي محسوب على الاسعار العالمية 2425 دولا ولما السعر العالمي يوصل 3000 دولار يعني بتتكلم في 4800 جنيه لجرام 21 في الصاغة وحوالي 7 الاف جنيه لعيار 24 وطبعا الزيادة هتطول باقي العيارات والسبايك والجنيهات الدهب.
طيب لو عاوز تستثمر في الدهب ياترى الوقت فات ولا لسه؟.. بناء على التوقعات والارقام اللي لسه قايلين عليها يبقي تشتري دلوقتي قبل بكرة الصبح لأن الاسعار في الطالع وبالتالي اي تأخير هيتخصم من المكاسب الكبيرة اللي هيحققها المعدن الأصفر ودي نصيحة تجار الدهب على فكرة واللي قولناه قبل كده هنا في بانكير على مدار الأيام اللي فاتت ونصيحة أخيرة لو هتشغل فلوسك في الدهب يبقي اشتري سبايك وجنيهات وابعد عن المشغولات عشان لما تيجي تبيع يبقي مكسبك كبير لأن التاجر هيحسبلك المشغولات دهب مستعمل ويشيل المصنعية على عكس السبايك والجنيهات.