ربع مليون جنيه تراجع في بعض الموديلات.. إيه اللى بيحصل في أسعار السيارات؟
يا ترى ايه اللى بيحصل فى سوق العربيات الزيرو فى مصر؟ وايه سبب حالة عدم الاستقرار اللى بيعانى منها السوق مؤخرا؟ وليه بعض الموديلات اسعارها انخفضت لأكتر من ربع مليون جنيه مرة واحدة؟
أسعار السيارات في مصر شهدت فى الفترة الأخيرة انخفاض كبير فى كل أنواع العربيات ومختلف الموديلات ووصلت قيمة الانخفاض فى بعض الأنواع والماركات إلى 250 ألف جنيه وفقاً لكل نوع.. ووفقا لما أعلنه وكلاء السيارات نفسهم سجل سعر سيارة «أوبل جراند لاند 2024 أتوماتيك - TOP LINE» تراجع جديد بنحو 225 ألف جنيه لتسجل نحو مليون و850 ألف جنيه بدلاً من 2 مليون و75 ألف جنيه.
وسجل سعر سيارة «أوبل جراند لاند 2024 HIGHLINE انخفاض بنحو 250 ألف جنيه لتسجل نحو مليون و700 ألف جنيه بدلاً من مليون و950 ألف جنيه.
وسجل سعر سيارة «تويوتا كورولا 2024 أتوماتيك - سمارت» تراجع بنحو 250 ألف جنيه لتسجل نحو مليون و500 ألف جنيه بدلاً من مليون و750 ألف جنيه.
طب ايه اللى حصل خلا اسعار العربيات تتراجع بالشكل ده ؟
سبب تراجع أسعار السيارات بيرجع بشكل أساسي إلى انخفاض الطلب على الشراء خصوصا وان فيه اعتقاد عند كتير من الناس ان اسعار العربيات مبالغ فيها جدا ولسه هتنزل أكتر الفترة الجاية مع كلام كتير عن انخفاض سعر الدولار ووصوله الى 43 جنيه نزولا من 48 جنيه حاليا
كمان أسعار السيارات الجديدة عاودت الانخفاض مرة تانية مع وجود وفرة في الدولار لدى البنوك العاملة فى مصر وده أدى إلى تزايد معدلا الشراء والبيع للمواطنين خصوصا مع هبوط أسعار السيارات ووصولها لمعدلات معقوله نوعا ما عما كانت موجودة عليه من فترة.
وطبعا استقرار سعر الدولار وعدم وجود تقلبات عنيفة وحادة في السوق أدى إلى خفض التجار أسعار السيارات الجديدة وده أدى لوجود انخفاضات في عدد من الموديلات الحديثة بقيمة تراجع بدأت من 15 وتجاوزت حد الـ30 % فى بعض الموديلات
وفى الايام الأخيرة بتعاني سوق السيارات الجديدة والمستعملة من ركود كبير بعد عودة ظاهرة «الأوفر برايس» بشكل مبالغ فيه والارتفاع الكبير فى اسعار معظم الموديلات
طب ده عن أسعار السيارات الجديدة.. ايه الأخبار بقا فى سوق المستعمل؟
لازم تكون عارف ان سوق المستعمل فى مصر بيتأثر بقوة بالجديد ولما الاسعار رفعت فى الزيرو سعر القديم طار فى السما وعشان كده مع التراجع اللى بيحصل فى لاعربيات الجديدة اسعار المستعمل بتنزل كل يوم
