الأرقام بتقول إيه.. هو ممكن المركزي يعملها ويفاجيء الأسواق
هو البنك المركزي ممكن يعملها ويخفض سعر الفايدة ويمشي عكس التوفعات بدل التثبت أو الرفع .. وإيه اللي ممكن يحصل ساعتها وليه المركزي ممكن يخفض سعر الفايدة تعالي نشوف إيه الحكاية مع بعض.. تابعونا للأخر
يوم الخميس الجاي زي ما احنا عارفي لجنة السياسة النقدية هتجتمع في اجتماعه الدوري لبحث أسعار الفايدة على الجنيه وباقي المؤشرات الاقتصادية وأهمها معدلات التضخم في الشهر اللي فات ودي هي أكتر حاجة بتحدد بوصلة لجنة السياسة النقدية في حسم اسعار الفايدة على الايداع والاقتراض وبالتالي البنوك بتحدد بناء عليها أسعار منتجات الادخار عندها.
طيب المركزي ممكن يخفض سعر الفايدة؟
زي ما قلنا لجنة السياسة النقدية بتاخد بالارقام والمؤشرات اللي قدامها وملهاش دعوة بالتوقعات الخارجية أو كلام خبرا الاقتصاد لأن جزء من الحقيقية والارقام بتكون غايبة عنه على عكس الارقام والدراسات المستفيضة اللي بتكون قدام لجنة السياسة النقدية.. وخلينا نفكركم إن اغلب التوقعات رايحة في اتجاه تثبيت سعر الفايدة الحالي لأن المركزي لسه محتاج سعر فايدة عالي عشان يسيطر أكتر على معدلات التضخم وإن أوان تخفيض أسعار الفايدة لسه مجاش.
طيب ارقام التضخم الأخيرة بتقول إيه؟
شوف حضرتك البنك المركزي نفسه كشف عن تراجع معدل التضخم الأساسي السنوي إلى 26.6% في يونيو 2024 مقابل 27.1% في مايو 2024 وكمان سجل معدل التغير الشهري في الرقم القياسي الأساسي لأسعار المستهلكين 1.3% في يونيو 2024 مقابل 1.7% في نفس الشهر من العام السابق وسالب 0.8% في مايو 2024.
وسجل معدل التغير الشهري في الرقم القياسي العام لأسعار المستهلكين للحضر، اللي أعلنه الجهاز المركزي للتعبئة العامة والإحصاء في 10 يوليو 2024، 1.6% في يونيو 2024 مقابل 2.1% في نفس الشهر من العام السابق وسالب 0.7% في مايو 2024.
وعلى أساس سنوي، سجل معدل التضخم العام للحضر 27.5% في يونيو 2024 مقابل 28.1% في مايو 2024... يعني لومشينا مع لغة الأرقام ومعاها تصريحات الحكومة الأخيرة بتراجع الاسعار في الاسواق من بين 25 و35 في المية يبقي منطقي جدا البنك المركزي يخفض أسعار الفايدة ويكون هو دا الوقت المناسب.
طيب ايه اللي هيحصل لو البنك المركزي خفض سعر الفايدة يوم الخميس اللي جاي؟
أكيد حاجات كتير هتحصل أولها الطلب على الاقتراض هيزيد سواء من الافراد أو الشركات مع انخفاض تكلفة التمويلات تاني حاجة البنوك هتخفض أسعار شهادات الادخار اللي عندها طبعا وده هيأثر على الاستثمار في الشهادات دي وممكن أصحاب السيولة يستثمروها في نشاط تاني، لكن في العموم اسعار الفايدة في البنوك بيكون ليها حسابات تانية خالص ودقيقة عشان كل بنك عاوز يحافظ على العملا اللي عنده والمركزي مش بياخد قرار غير بالتنسيق مع البنوك.
