مفيش ديون ومفيش صندوق نقد تاني.. إيه اللي حصل

 

خلاص صندوق النقد الدولي هيبقي ذكرى ومش هيكون كرباج يخوف الدول ولا يفرض عليها شروطه ومش هيبقي  سيف مسلط على رقبة الحكومات لو قالت له لأ في يوم من الايام.. ايه اللي حصل .. تعالي نشوف إيه الحكاية وإزاي مصر أكبر مستفيد من وجود بديل للصندوق

مصر لو متعرفوش تاني أكبر زبون عند صندوق النقد الدولي يعني تاني أكبر مقترض منه بعد الارجنتين ورغم كده العلاقة بين مصر والصندوق مش في احسن أحوالها وشفنا اللي عمله الصندوق مع الحكومة في 2023 وإزاي وقف أو جمد القرض في وقت مصر كانت في عرض دولار ودا عشان يجبر الحكومة إنها تعوم الجنيه في وقت مكانش مناسب بالمرة وكان هيعمل كوارث في مصر.
وفضلت العلاقة في أزمة مع صندوق النقد بسبب تدحله المبالغ فيه ومحاولة تحكمه في السياسة المالية للدول ودا كان نقطة خلاف تانية وده غير إن الصندوق بيقرض بفايدة كبيرة وكمان بيعمل مراجعات صعبة وبياخد قرارات فجائية خلت التعامل معاه صعب ودا لأن مفيش بديل عنه في العالم لكن يظهر إن الواقع ده هيتيغير خلاص وصندوق النقد الدولي مش هيلاقي حد يستلف منه.. تعالي نقولك إزاي
من ساعات كان ألكسندر باباكوف، نائب رئيس مجلس الدوما الروسي طلع وقال تصريح مهم جدا وهو إن دول بريكس بحاجة إلى إنشاء نظيرها الخاص لصندوق النقد الدولي والبنك الدولي.. يعني إيه الكلام ده... يعني المسئول الروسي الكبير واحنا عارفين إن روسيا هي المحرك الاساسي لتكتل بريكس  قال إن البريكس لازم يكون لها صندوق نقد دولي خاص بيها وبنك دولي بردو يكون بتاعها عشان دول بريكس ما تضطرش تقترض من صندوق النفقد الدولي الحالي بشروطه المجحفة وفايدته العالية جدا.
باباكوف قال الكلام دا في وجود الرئيس بوتين وفي المنتدى البرلماني لدول بريكس وقال إن أهم حاجة وأكيبر تحدي لمجموعة بريكس دلوقتي هو إنشاء نظام مالي جديد يخدم دول البريكس ومنها انشاء صناديق وبنوك التمويل لمساعدة الدول الاعضاء على التنمية الاقتصادية والاقتراض بسهولة وبشروط ميسرة وفايدة شبه معدومة بدل اللجوء لصندوق النقد الدولي زي ما قلنا.

مسئول البرلماني الروسي قال كلام مهم تاني وهي إنه في حالة انشاء نظام مالي جديد في البريكس هيحصل انطلاقة اقتصادية كبيرة في دول الاعضاء وهيضمن السيادة الحقيقية لدول بريكس، والدول اللي لسه بتخطط للنظر في التعاون مع المنظمة.
أكيد خطوة زي دي مصر هتكون أكبر مستفيد منها لأنها عضو رسمي في البريكس وكمان تاني أكبر مقترض من صندق النقد وأكتر دوله متضررة من شروطه اللي بيفرضها خاصة وقت الازمات ولو تخلصت من الصندوق وديونه هيفرق كتير في الوضع الاقتصادي والمالي لمصر.