فندق متحرك على قضبان سكة حديد مصر.. يا ترى إيه الحكاية؟
كامل الوزير بيعمل عظمة، كل ما يتكلم عن مشروع مايفوتش سنة غير والمشروع ده شغال.. أو موجود على أرض الواقع.. إيه الجديد اللي هيعمله تان في البلد وإزاي المشروع هقلب موازين الترفيه والنقل والسياحة والسفر في مصر .. تعالو نشوف ايه الحكاية..
في الأيام الأخيرة، الفريق كامل الوزير، وزير النقل والصناعة ونائب رئيس الوزراء، شهد توقيع اتفاقية شروط وأحكام بين هيئة سكك حديد مصر وشركة “أرسينال” الإيطالية، وده عشان يشغل خدمة جديدة لركاب القطارات، اسمها (قطار حارس النيل) ..إيه قصة القطر ده؟ ..
بص يا سيدي، شركة أرسينال الإيطالية بتشغل قطر سياحي في روما، اسمه "لادولتشى فيتا"، وظيفته أنه يتجول بالسياح في المناطق الأثرية والسياحية هناك، ودلوقتي بتفكر تنقل التجربة دي لمصر، عشان كده بتتعاقد مع وزارة النقل لأنها الجهة الوحيدة المخول لها تنفيذ هذا المشروع.
طب القطر ده هيشتغل فين بالظبط؟.. وهل للسياح فقط؟
طبعا لا، القطر ده هيكون للسياح والمصريين، ووظيفته أنه يخدم على السياحة، أو بالمختصر المفيد، هيبقي قطر خصوصي لنقل المتجولين بين الأماكن السياحية والمعالم الأثرية في مصر في رحلة واحدة، هينقلهم لحتة حتة ويقف يستناهم لحد ما يخلصوا جولتهم.
كمان مخطط له القيام برحلات من القاهرة لحد الأقصر وأسوان بشكل شبه يومي، ومساره هيكون قريب جدا من المعالم السياحية الشهيرة، يعني هيستناك لما تخلص جولتك، وبعد كده يكمل رحلته عادي.
القطر مكون من 15 عربية و40 كابينة، وكمان فيه أجنحة فاخرة للمسافرين شبيهة بالفندق السياحي.
شكل القطر (حارس النيل) هيكون مختلف تماما عن قطارات السكة الحديد العادية اللي بنشوفها كل يوم، فهيكون شكله بيعكس الحضارة الفرعونية القديمة.
المفاجأة بقي إن المشروع كله هيتنفذ بالكامل على نفقة الشركة الإيطالية، يعني مصر مش هتدفع ولا قرش. وفي نفس الوقت الدولة هستفيد أكتر من وصول السياح لأكتر المناطق السياحية لأنهم هيصرفوا أكتر وأكتر غير إنهى هيكون معلم حضاري لمصر ونقلة في قطاع السياحة.
ولو عايز تعرف مدة الرحلة، في الحقيقة هي هتكون 3 أيام وليلتين، يعني اعتبر نفسك مقيم في فندق طاير على قضبان السكة الحديد.
كمان، القطر ده عبارة عن مزيج بين الترفيه والرفاهية والفخامة، وهتكون تجربة ركوبه فريدة لكل اللي نفسه يسافر في رحلة سياحية، سواء من المصريين أو من السياح الأجانب.
طبعا حضرتك هتسألني "هيشتغل امته" وسعر تذكرته كام؟ المفروض أنه مخطط يشتغل خلال سنتين، وسعر التذكرة بيتحدد بعد ما المشروع يخلص تماما.
وفي النهاية متابعنا العزيز، لو هتسافر في رحلة سياحة داخلية، هتجرب القطر "حارس النيل" ولا لأ؟
منتظرين ردودكم في التعليقات.
