بعد إعلان المحافظات وقف تخفيف الأحمال.. رد صادم ومفاجأة جديدة
طبعا كلنا فرحنا لما بعض المحافظات اعلنت عن خبر وقف خطة تخفيف الاحمال علي شبكة الكهرباء، خصوصا اننا في شهور الصيف واللي طبعا مش هنقدر نسنتغي عن التكييفات والمراوح... يا تري هل فعلا الدولة قررت وقف خطة تخفيف الاحمال... ولا هيكون في قطع كهربائي تاني في الفترة اللي جاية
مشكلة قطع الكهرباء وتخفيف الاحمال واحدة من المشاكل الكبيرة جدا علي مكتب الحكومة في الفترة الرئاسية الجديدة واللي المشكلة الابرز حاليا وعلشان ده أول لقاء واجتماع عمله الدكتور مصطفي مدبولي رئيس مجلس الوزراء اتكلم فيه مع وزراء الكهرباء والطاقة المتجددة والمالية والبترول عن خططهم لحل أزمة قطع الكهرباء واية هيا الموراد المتاحة قدامهم لحل الازمة نهائيا.
وعلشان نكون عارفين كمان ليه الكهرباء بتقطع عندنا هنا في مصر من فترات طويلة والسبب ده بيرجع لضعف امدادات الوقود اللازم لتشغيل محطات توليد الكهرباء واللي هو عبارة عن غاز طبيعي ومازوت، ودول المولدات بتاع الكهرباء بتحتاجهم للتشغيل وحصل فيهم انخفاض علي مدار الشهور اللي فاتت وعلشان كده كان في تشغيل لبعض المولدات ووقف لجزء منهم بسبب انه مفيش وقود علشان المولدات تشتغل بيه بكامل طاقتها.
طيب اية هيا حكاية وقف تخفيف الأحمال اللي اعلنته بعض المحافظات امبارح ده؟.
بص يا سيدي بعد اجتماع مجلس الوزراء مع وزراء الكهرباء والبترول والمالية، تم الاتفاق علي بدء استيراد شحنات من المازوت والغاز الطبيعي من الخارج، والشحنات دي فعلا بدأت توصل لمصر، وبدأت وزارة البترول في نقلها لمحطات توليد الكهرباء علشان تدخل التشغلي الفعلي لمحطات التوليد، والشحنات دي هتكون متاحة للاستخدام الفعلي للتشغيل لمدة 3 شهور هما يوليو وأغسطس وسبتمبر، وبالتالي الدولة خلال الـ3 شهور وهما شهور الصيف دول مش هيكون عندها ازمة تخفيف الأحمال في الكهرباء ومش هيكون في قطع جديد في التيار في الفترة اللي جاية .
مجلس الوزراء اعلن رسميا انتهاء خطة تخفيف الأحمال اعتبارا من الاسبوع الثالث من شهر يوليو الجاري وتحديدا من يوم 21 من الشهر ده، ومن اليوم ده مفيش كهرباء هتقطع تاني علي البيوت والاحياء بشكل كامل زي ما كان بيحصل قطع في الكهرباء بالساعات في الايام اللي فاتت، ولحد اللحظة دي مفيش قرار رسمي طلع بوقف خطة تخفيف الأحمال نهائيا.
طيب اية حكاية وقف خطة تخفيف الاحمال اللي اعلنت عنها المحافظات امبارح دي لما لسه القرار الرسمي بتاع وقف خطة تخفيف الأحمال مطلعش؟.
بص يا سيدي اللي حصل امبارح من المحافظات بخصوص خطة وقف تخفيف الأحمال ده كان عبارة عن تجربة من شركات التوزيع لقوة وتحمل الشركة القومية للكهرباء لكفاءة التشغيل خصوصا ان الشبكة هتشتغل بشكل كامل في الايام اللي جاية علشان مش هيكون عندنا ازمة تخفيف الأحمال، والاختبار ده جاي بسبب الارتفاع الكبير في درجات الحرارة اللي بتشهدها مصر في الوقت الحالي واللي طبعا بياثر علي كفاءة وقوة شبكة توزيع الكهرباء علي مستوي الجمهورية، وعلي فكرة درجات الحرارة المرتفعة دي ممكن تاثر وبشكل كبير جدا علي انتظام ضخ التيار الكهربائي وممكن يحصل قطع جديد في الكهرباء، ومن هنا شركات التوزيع بتعمل اختبار لقوة الشبكة علشان لو في ضعف او تهالك لجزء معين منها يتم معالجته قبل ضخ التيار بشكل كامل وعدم التاثير علي قوة التشغيل.
