الاستثمار في الدهب عيار 21 أفضل ولا السبائك.. هنقولك على السر
ليه الاستثمار في الدهب دلوقتي هو أفضل أنواع الاستثمارات وايه الافضل الاستثمار في الدهب عيار 21 ولا في السبايك عيار 24 وليه كل ده هنشرحه لحضراتكم في الفيديو ده خليكم معانا للآخر.
عاوز تعرف ليه الدهب دلوقتي هو أفضل طريقة ممكن تشغل وتحفظ بيها فلوسك وكمان هتزيد مع الايام.. شوف ياسيدي الدهب المعدن الوحيد اللي قيمته بتزيد مع الأيام وعشان كده قالوا عمر الدهب ما بيخسر وكل التوقعات بتقول إن الأيام والشهور الجاية هي ايام الدهب وهيشهد ارتفاعات كبيرة وقياسية مع اتجاه بنوك مركزية دولية لشراء المعدن الأصفر بكميات كبيرة في الأيام الجاية حسب ما أعلن مجلس الذهب العالمي وده هيسبب طلب كبير على المعدن النفيس وبالتالي أسعاره هتزيد اكتر عالميا والبنوك المركزية هتشتري الدهب لأكتر من سبب أولها إنه ملاذ آمن مع كل التوترات السياسية والاقتصادية والصراعات العسكرية في العالم واللي بتأثر بالسلب على اقتصاديات الدول واحتياطاتها النقدية وكمان اتجاه بنك الاحتياط الفيدرالي الأمريكي لخفض سعر الفايدة سبب خوف كبير لدى البنوك المركزية من انخفاض قيمة الاحتياطي المقوم بالدولار عندها.
يعني الدهب هيزيد عالميا حسب كل التوقعات دي وفيه توقعات بتقول إن الأونصة هيوصل سعرها 3000 دولار من أقصى ارتفاع وصلته وهو 2400 دولار والفرق في الزيادة دي سوق الدهب في مصر هيتاثر بيها بشكل مباشر وبالتالي الأسعار هترفع كمان وعشان كده ده الوقت المناسب لو بتفكر تستثمر في المعدن الأصفر
لكن أيهما أفضل كاستثمار المشغولات الذهبية عيار 21 ولا سبايك الذهب عيار 24؟
شوف حضرتك السؤالده جاوب عليه عمرو المغربي عضو شعبة الذهب في الاتحاد العام للغرف التجارية، وقال إن عيار 24 والجنيهات الدهبية عيار 21 هي الأكتر مبيعًا للراغبين في الاستثمار لكن الاستثمار في السبايك والعملات الدهب أفضل من المشغولات الدهبية لانه أوفر من حيث انخفاض سعر المصنعية لكن كتير من الناس بتفضل تشتري المشغولات عيار 21 أو عيار 18، باعتبار المشغولات زينة واستثمار في نفس الوقت، لكن مصنعيتها بتكون كبيرة مقارنة بالسبايك والجنيهات الدهب وبتخسر سعر المصنعية في البيع لأن التاجر بيعتبرها دهب مستعمل وبيضرب السعر على عكس السبايك والجنيهات.
ووجه الخبير نصيحة للراغبين في شراء الدهب وهي أنهم يشعرون من أماكن موثوق بها و تكون مرخصة وخاضعه للرقابة من جهات الدولة، لأن في الفترة الأخيرة انتشرت ظاهرة غش الدهب وخلطه بالنحاس وكمان نصح بعدم البيع إلا في حالة الضرورة وده لان الدهب بيعتبر الملاذ الآمن على المدى البعيد للفلوس واللي قيمتها بتزيد كل ما يقعد ولفترة مش أقل من 3 سنين.
