إيه اللى بيحصل في ملف ديون مصر؟.. تطورات مهمة وخطيرة
يا ترى ايه اللى بيحصل فى ملف ديون مصر الخارجية؟ وازاى مصر سددت 25 مليار دولار من 168 مليار ورغم كده حجم الديون وصل الى 160 مليار؟ وليه الحكومة حاليا مركزة في ملف الديون الخارجية؟
من ساعات قليلة كشف تقرير صادر عن معهد التمويل الدولي ان مصر سددت 25 مليار دولار من دينها العام المحلي والخارجي خلال النص الأول من 2024
التقرير قال ان سداد الديون دي جاء نتيجة لصفقة رأس الحكمة واللي تضمنت تحويل ودائع إماراتية بقيمة 11 مليار دولار لدى البنك المركزي إلى استثمارات بالعملة المحلية إضافة إلى سداد سندات "يوروبوند" بقيمة 2 مليار دولار وده بيعادل تقريبا 7% من الناتج المحلي.
مفتش ساعات على تقرير معهد التمويل الدولي الا ونشرت وزارة التخطيط بيانات مستندة لإحصاءات البنك المركزي أكدت فيها تراجع ديون مصر الخارجية خلال الربع الأول من عام 2024 بنسبة 4.4% ليسجل 160,607 مليار دولار، مقابل 168,034 مليار دولار خلال الربع الأخير من 2023 بانخفاض قدره 7,427 مليار دولار.
فيا ترى ايه الفرق بين كلام معهد التمويل وبيبن بيانات وزارة التخطيط؟
بص يا افندم تقرير معهد التمويل الدولى بيتكلم عن ديون مصر بشكل عام ديون داخلية وديون خارجية يعن الفلوس اللى مصر واخداها من مؤسسات تمويل دولية والفلوس اللى الحكومة مقترضاها من الداخل
حد ممكن يسأل ويقول وهى الحكومة بتقترض من الداخل؟
ايوه ا افندم مصر بتقترض من الداخل من خلال اذون الخزانة والسندات اللى بيطرحها البنك المركزي نيابة عن وزارة المالية ودي أدوات دين داخلية بتشتريها مؤسسات وأفراد وبتلجأ ليها الحكومة لسد العجز وتوفير سيولة مالية .. ودي التزمات وديون على الحكومة بتسددها باتنظام طول السنين اللى فاتت
وده يفسرلك التضارب فى الارقام يعنى لو حسبتها على حسبة معهد التميول فالمفروض مصر سددت 25 مليار دولار من 168 مليار فيكون اللى باقي 143 مليار دولار مش 160 مليار دولار
لكن لو ضيفت الدين المحلى هتعرف ان الارقام صح ومفيش تضارب ولا حاجة
وكان الدين الخارجي لمصر ارتفع خلال الربع الأخير من 2023 بنسبة 2.1% ليسجل 168.03 مليار دولار، مقابل 164.52 مليار دولار خلال الربع السابق بزيادة 3.51 مليار دولار.
وعلى أساس سنوي تراجع الدين خلال الربع الأول من عام 2024 بقيمة 4.754 مليار دولار مسجلاً 160,607 مليار دولار بنهاية مارس، مقابل 165.361 مليار دولار في الفترة ذاتها العام الماضي.
وخلال العام المالي 2023-2022 ارتفع الدين الخارجي لمصر بقيمة 9.02 مليار دولار مسجلاً 164.728 مليار دولار بنهاية يونيو مقابل 155.708 مليار دولار في الفترة ذاتها العام الماضي، وفقاً لبيانات البنك المركزي.
