هينزل لـ 40 ولا هيقفز لـ 60 .. مصير الدولار فى مصر
![الدولار]( /UploadCache/libfiles/5/6/600x338o/209.jpg)
يا ترى سعر الدولار فى مصر هيقفز الى 60 جنيه زي ما فيه ناس بتقول ولا هينخفض الى 40 جنيه زي ما فيه ناس تانية بتتوقع ؟ وليه اسعار الدولار رجعت تزيد بشكل ملحزظ بعد أجازة عيد الأضحى فى البنوك؟ وهل فيه تدفقات دولارية ممكن تدخل مصر الفترة الجاية وتساهم فى ضبط سوق الصرف؟
من بعد نهاية اجازة عيد الأضحى فى البنوك والدولار شادد حيله على الآخر وتقريبا كل يوم سعره بيزيد بمعدلات ملحوظة ووصل حاليا الى حدود 49 جنيه وده اللى خلا ناس كتيرة ترجع تتكلم من تانى عن ارتفاع سعر الصرف وفيه ناس بتتوقع وصول الدولار الى 60 جنيه بحد أقصى فى نهاية 2025 وناس تانية على العكس تماما بتقول ان سعر العملة الأمريكية ممكن ينخفض الى حدود 40 جنيه مع استمرار التدفقات النقدية الأجنبية على مصر الفترة الجاية وتنفيذ أكتر من صفقة ضمن برنامج الطروحات الحكومية اللى بتنفذه الدولة ومن خلاله بتتخارج من عدد من القطاعات لصالح القطاع الخاص.
وحتى مؤسسات التمويل الدولية اختلفت حوالين سعر الدولار الرسمي في مصر خلال عام 2024وفيه مؤسسات شايفة أن الدولار هيواصل رحلته التصاعدية وفيه مؤسسات تانية بتقول ان الدولارهينخفض بشكل ملحوظ فى غضون شهور قليلة.
وبترى مؤسسة "كابيتال إيكونوميكس" بمنطقة الشرق الأوسط، أن سعر الدولار هيصل إلى ما بين 60 وحتى 65 جنيهًا خلال العام الجاري، خصوصًا بعد التزام الحكومة المصرية بنظام صرف أكثر مرونة، وهو بحسب اتفاقها مع صندوق النقد الدولي.
وبيتوقع البنك الأمريكي “جي بي مورجان” أن يصل سعر الدولار بين 45 و50 جنيهًا خلال 2024 بسبب صفقة رأس الحكمة واللي وفرت سيولة دولارية ضخمة.
وفي فبراير اللى فات زي ما كلنا عارفين وقعت مصر مع شركة أبوظبي القابضة الإماراتية اتفاقية تقتضي بتطوير مدينة رأس الحكمة بمحافظة مرسى مطروح، بقيمة بلغت نحو 35 مليار دولار ودي أكبر صفقة استثمارية حصلت فى مصر.
ووفرت الصفقة سيولة دولارية كبيرة مكنت مصر من تحرير سعر صرف الجنيه امام العملات الأجنبية وكمان ساهمت فى سداد التزمات الحكومة الخارجية وهقضت على السوق السودا للعملة ونجحت البنوك العاملة في مصر فى جمع حصيلة ضخمة من تنازلات المصريين من النقد الأجنبي لصالح الجنيه واللي تخطت حاجز الـ 30 مليار جنيه من وقت تحرير سعر الصرف فى 6 مارس اللى فات ولحد دلوقتي