ليه الدهب زاد 40 جنيه في أسبوع العيد وليه لسه هيولع
![الذهب]( /UploadCache/libfiles/5/6/600x338o/20.jpg)
ليه الدهب زاد بشكل كبير في اسبوع العيد وياترى لسه هيزيد تاني وايه هي توقعات الأيام الجاية في الصاغة وليه التجار بيحذروا من أزمة كبيرة جاية في الطريق.. خليكم معانا للآخر وهتعرفوا التفاصيل
في يوم الخميس 13 يونيو اخر يوم للتداول في الصاغة قبل دخول إجازة العيد سجل الدهب عيار21 حوالي 3110 جنيه للجرام الواحد وبعد اسبوع تقريبا سجل نفس العيار النهارده 3150 جنيه يعني بنتكلم في زيادة 40 جنيه تقريبا في أيام معدودة.. ياترى الزيادة دي جت منين..
الحقيقة الموضوع مش سر ولا حاجه لكن لو فاكرين حضراتكم زي ما قلنا في فيديوهات قبل كده كتير هنا في بانكير ان الدهب سعره بيزيد في موسم العيد بسبب زيادة الطلب على الدهب مقابل ثبات المعروض لان أيام العيد زي ما هو معروف موسم خطوبه وزواج واحتفالات وكتير من المصريين بيفضلوا يشتروا هدايا دهب في الأعياد.. وكمان في نفس الوقت بتكون فرصه لناس كثير تستثمر في المعدن الأصفر وتشتري بكميات كبيرة خاصة المصريين المغتربين اللي نازلين اجازات واللي بيفضلوا الاستثمار في الدهب والاحتفاظ بيه كعامل أمان ضد غدر الزمن لان زي ما احنا عارفين المعدن النادر ثبت بالتجربة وزي ما قلنا كثير قبل كده انه معدن لا يخسر أبدا وزي ما قلنا في اسبوع العيد زاد 40 جنيه مرة واحدة.
طيب ايه اللي هيحصل في الصاغة الايام الجايه ؟..
شوف حضرتك.. الموضوع ما لوش علاقه بالتوقعات ولا بالتنبؤات لكن دي أرقام ومعادلات وتوقعات سوق والتوقعات بتقول إن الاستثمار الأكبر رايح على الدهب في الشهور الجاية ولغاية اخر سنة 2025 وامكن يوصل لبدايات 2026 وان الدهب اسعاره هتكون في الطالع والجرام اللي بيطلع مابينزلش تاني وقتها.. طيب عارفين هزيد ليه؟.. علشان الدهب دلوقتي وسط كل التوترات العالميه والازمات الاقتصاديه والتوتر في خطوط التجاره العالمية وارتفاع اسعار السلع بقى هو الملاذ الآمن للدول والأشخاص والمستثمرين والبنوك المركزية وللهيئات الاقتصادية وزيد على ده كله فيه أزمة كبيرة ظهرت في الأفق بخصوص المعروض عالميا من المعدن الأصفر بسبب زيادة السحب والطلب من البنوك المركزية على المعدن النفيس وفي نفس الوقت بسبب شح عمليات استخراج والتنقيب عن الدهب وإن شركات التنقيب بتواجه أزمات في العثور على المعدن النفيس ودي اكتر حاجه بتهدد سوق الدهب طبعا وهتخلي أسعاره تقفز بشكل خارج عن السيطرة والخوف بقي أن الخبراء قالوا إن الايام دي هي بداية فوران الدهب وإنه هياخد منحني الصعود اكتر في الأيام الجاية.
كل الأسباب اللي قلناها دي مش بتقول غير حاجة واحدة وهي إن الدهب رايح في سكة اللي هيزيد ما يرجعش ودي مش كلامنا لكن كلام خبراء السوق العالمية و الشركات المتخصصة ومستثمرين كبار جدا وناس فاهمة اللي بيحصل وده طبعا هيكون ليه تأثير كبير على سوق الدهب عندنا في مصر لان سعر 21 عيار هيوصل 5000 جنيه وانت طالع ودي بردو توقعات قوية لأن مصر مش معزولة عن العالم وجزء كبير من حركة الأسعار عندنا بتتاثر بالاسعار العالمية لانه كله سوق واحد وعرض وطلب.
طيب نعمل ايه دلوقتي ؟
لسه العقل بيقول طبعا والمنطق ان طالما الدهب رايح في العالي يبقى اكيد انك استغل الفرصة دلوقتي والسعر لسه حنين ومعقول وتشتري دهب وتشيله على جمب وخلال سنتين تلاتة اللي جايين هتكسب فلوس كتيرة والافضل تشتري دهب سبايك وجنيهات دهب لانه اكتر انواع الدهب بيحتفظ بقيمته على عكس المشغولات واللي التاجر بيعتبرها دهب مستعمل لما تيجي تبيع وسعره بيكون أقل شوية فلو معاك فلوس زيادة هات دهب وشيله للزمن ومش هتندم لان زي ما قلنا لحضرتك الدهب فلوسه فيه وبتزيد مع نفسها