إيه ميزة تخزين الدهب.. هنقولك سر الاستثمار السحري
![الذهب]( /UploadCache/libfiles/5/5/600x338o/961.jpg)
ليه الدهب قيمته بتزيد والاستثمار فيه مضمون ومش بيخسر وإيه ميزة انك تشغل فلوسك في الدهب.. هنقولك على كل التفاصيل
معروف إن فيه أكتر من مجال للاستثمار في مصر والاستثمار باختصار هو نشاط بتحط فيه فلوسك عشان حاجتين ملهمش تالت أو لها إنك بتحفظ فلوسك من الضياع او انك تصرفها في حاجة ملهاش لازمة وتاني حاجة إنك بتزود فلوسك وتحقق منها أرباح بدل ما هي مركونة كده.
وعادة المصريين بيشغلوا فلوسهم في أكتر من نوع من الاستثمار زي الدهب والعقار وشهادات الادخار والبورصة وعمل المشروعات الخاصة وكل نوع من الأنواع دي ليه مزايا وعيوب عشان مفيش استثمار كامل في العالم وكل واحد فينا بيختار الحاجة اللي بيفهم فيها عشان مايغامرش بفلوسه.
طيب ليه الدهب هو الأساس في الاستثمار الشعبي .. عشان حاجات كتير حضرتك أولها إنه استثمار مضمون الربح وقيمته بتزيد مع الأيام وكل اللي عليك غير إنك تشوف أنسب وقت تشتري فيه بأقل الأسعار وبعدها تخزن دهبك في مكان أمين وتصبر عليه مش أقل من 3 سنين عشان تاخد مبلغ محترم كمكسب زيادة على فلوسك الأصلية.
كمان ميزة الدهب إنه مش بياخد حيز وحجمه مش كبير يعني تقدر تحافظ عليه في مكان أمين وكمان تشغيل فلوسك في المعدن الأصفر بيحمي فلوسك من انخفاضات العملة والقرارات الاقتصادية المفاجئة ده غير إنك مش بتتعب في اجرااءت ولا تصاريح ولا أوراق وموافقات لو هتشغل فلوسك في مشروع خاص، والتوقعات العالمية دلوقتي بتقول إن الدهب طالع بسرعة الصاروخ في الأيام الجاية وعلى نهاية 2024 هيسجل من 2500 إلى 3 الاف دولار للأونصة من 2400 دولار حاليا ودي بيقول إن لو حضرتك اشتريت دهب دلوقتي وبعته في أخر السنة فلوسك هتزيد أكتر من التلت ومن غير ما تتعب في أي حاجة غير إنك بتشتري وتبيع.
طيب ايه مخاطر الاستثمار في الدهب.. أهم عيب فيها إنك تشتري وتبيع في الوقت الغلط يعني ما ينفعش تشتري والأسعار في الذروة لأن ده هيقلل مكسببك على المدى البعيد وكمان ما ينفعش تبيع الدهب اللي عندك والسوق نايم او الأسعار قليلة، ومن الخطر كمان إن فيه ناس بتوقع فريسة لتجار معندهمش ضمير وبيغشو الدهب بالنحاس مثلا وعشان كده لما تروح تشتري خد خبير معاك أو حد بيفهم في الدهب عشان ما يضحكش عليك وتشتري من تاجر ثقة.