لو لسه مبتديء.. أهم 5 أسئلة لازم تعرفهم قبل ماتحط فلوسك في الدهب
كل مصر بقت بتابع أسعار وسوق الدهب في اخر سنتين وده بعد ما تحول المعدن الأصفر لملاذ آمن واستثمار مربح في وقت الأزمات وقدرته على الحفاظ على قيمة الفلوس.. لو لسه بتفكر تستثمر في الدهب بفلوس كتيرة هنقولك على اهم 5 حاجات لازم تعرفهم قبل ماتبدأ الخطوة الأولي ..
معروف إن الدهب هو السلعة الأكتر تداول في العالم، بحصة تقارب 15٪ من سوق السلع العالمية وده كلام البنك الدولي والمؤسسات العالمية ومن النسبة تقدر تعرف حجم التداول اليومي العالمي على المعدن الأصفر وحجم الفلوس اللي بتشتغل فيه.
ومظاهر الاستثمار في الدهب ليا صور كتير في مصر والعالم من افراد وشركات وأسهم وعقود آجلة وبورصات واحتياطات بنكية وليلة كبيرة وأهمية الدهب وسط كل الاستثمارات دي لأنه معدن نادر يعني بيحفظ قيمته وبتزيد دايما خاصة لو قل المعروض منه عالميا وعشان كده هو استمثار مربح على طول الوقت وده سر الدهب..
نيجي لأهم 5 أسئلة قبل الاستثمار في المعدن النفيس قبل ما تبدأ تشتغل فيه عشان الصورة بتبقي واضحة عندك.
أو سؤال إيه هي أهم الطرق اللي استثمر بيها في الدهب؟
لو هشتغل في الدهب يبقي لازم تعرف إن فيه 3 حاجات تستمثر فيهم مش بس انك تشتري وتخزن وبعدها تبيع وتكسب وأولها الأسهم ودا بيفضله أغلب المستثمرين الكبار واللي بيستثمرو في المعدن الاصفر عن طريق شراء أسهم في الشركات العاملة في استخراج الدهب؛ وده لأن أسعار أسهم الشركات دي مرتبط بسعر الدهب وفي مصر شركات كتيرة للتنقيب عن المعادن ومنها المعدن النادر.
تاني طريقة ممكن تستثمر فيها بالدهب هي صناديق الاستثمار المتداولة واللي هي أساسا بتستثمر في الدهب واللي بتداول من خلال بورصات الأسهم أحيانا والدكتور مصطفي مدبولي اتكلم قبل كده عن فكر جديد لاطلاق صناديق الاسثمار في الدهب ويقدر اي مواطن يشغل فلوسه من خلالها.
تالت حاجة من طرق الاستثمار في الدهب بيسموها امتلاك الدهب المادي زي السبايك والمشغولات والمجوهرات وده أكتر استثمار معروف في مصر.
عرفنا الطرق طيب إزاي تستثمر في الدهب؟
أول حاجة لازم تعرف السوق رايح على فين وتابع بنفسك أو عن طريق وكيل يكون بيفهم في السوق كويس جدا ويعرف إمتي يشتري وامتي يبيع ويكون على دراية كاملة بالتوقعات كمان في السوق لأنه جايز يكون فيه مؤشرات ان الدهب هيرفع بشكل كبير بعد شهرين مثلا يبقي هنا ما ينفعش يبيع وهكذا.
طيب إيه اختلاف الدهب عن الأسهم والسندات؟
ميزة الدهب إنه مش بتاخد منه عائد سلبي أو بتخسر في الغالب لانه دايما رابح وده لأنك بتابع حركة السوق وطبيعي مش هتبيع بالخسارة وهستنى الوقت المناسب على عكس الأسهم والسندات واللي بتتعرض لخسائر مفاجئة.
إزاي بيتم تداول الدهب؟
فيه نوعين من تداول الدهب أو طريقتين للتعامل خلال الاستثمار وهي الافراد واللي غالبا بيفضلوا يكسبو على المدى القصير بالاستفادة بتقلبات الاسعار يعني لو اشتري دهب دلوقتي ممكن يبيعه بعد شهر لو لقي فارق ربح معقول لكن في المقابل اغلب المستثمرين الكبار بيفضلو الاستثمار في الدهب طويل الاجل يعني مش بيبيعوا قبل 3 أو 5 سنين كحد أدني مثلا لأنه بيكون معاهم كميات كبيرة.
إيه هي أفضل الأوقات للشراء والبيع؟
أكيد طبعا لما كل التوقعات تقول إن الأسعار اللي في الصاغة مش هتزل تاني وهتاخد دورة الارتفاع وهنا تلحق تشتري قبل ماتزيد
أخيرا إيه هي المخاطر في الاستثمار بالدهب؟
مفيش تقريبا مخاطر غير إنه ممكن يتسرق منك أو تضيعه على عكس العقار أو الشهادات الادخارية مثلا.
