المشروع أبو 10 مليار دولار بدأ.. حكاية أضخم حدث بعد رأس الحكمة
أي اللي بيتم ويتنفس دلوقتي في صعيد مصر وايه حكاية المشروع أبو 10 مليار دولار.. ايوا دولار اللي هيقلب الأوضاع في صعيد مصر وليه في الصعيد تحديدا وايه الإضافة اللي ممكن يضيفها.. خليكم معانا للآخر وهتعرفوا التفاصيل
زي ما قلنا امبارح ولسه هنقول النهاردة وبكرة إن الاستثمار والانتاج والتصدير هو ده الاقتصاد الحقيقي لا ي بلد بتفكر تنهض وتزدهر وغير كده يبقي تضييع للوقت ومصر عرفت هي عايزة ايه من بكرة وازاي لازم تكون دولة بحق وحقيق ولازم يكون عندها اقتصاد قوي وكبير ومتنوع ويحقق الوفرة الاقتصادية وعشان كده البلد مشيت في اكتر من اتجاه في التصنيع مثلاً الحكومة بتسابق الزمن عشان توطن الصناعات الكبيرة والمتوسطة والصغيرة ده غير الصناعات الدقيقة والإلكترونية والدقيقة وفي تخصصات اول مرة تدخل المنطقة زي صناعة المحمول الذكي والأجهزة الطبية الدقيقة والمعقدة ونجحت لحد كبير في ده.
كمان على طريق التصدير وحركة التجارة مصر ماشية كويس جدا وحسب خطة انها تحقق رقم 100 مليار دولار وقربت جدا من ده كبداية والتصدير عامل مهم جدا لاستقرار اي دولة لأنه بيوفر لها السيولة النقدية الأجنبية باستمرار وده بينعكس على أسواق الصرف عندها وبالتالي على أسعار السلع والخدمات ومفيش دولة بتصدر بشكل واسع هتلاقي عندها أزمات اجتماعية كبيرة أو صعوبة معيشية.
نيجي بقى لملف الاستثمار بأنواعه وده ملف مهم جدا لأنه معناه في كيان أو شركة أو فرد أو أي كان بيجي عندك ويدفع بالدولار ويعمل مشروعات ويشغل الشباب ويفتح فرص عمل مباشرة وغير مباشرة ويعمل صناعة جديدة أو خدمة أو منشآت اقتصادية كبيرة ايا كان نوعها عشان هو يكسب وعشان في نفس الوقت يضيفلك انت واقتصاد بلد أنه يشغل عجلة الاقتصاد وشفنا قد ايه الاستثمار ممكن يغير حياة شعوب ويقلب دفة الاقتصاد والمال وسوق الصرف زي ما حصل وعملت صفقة رأس الحكمة الضخمة واللي هتبدأ ب35 مليار دولار وهتوصل ل150 مليار دولار إجمالي الاستثمارات.
طيب ايه اللي حصل في ملف الاستثمار تاني ؟
شوف ياسيدي رأس الحكمة دي البداية بس ولسه فيه صفقات ضخمة في الطريق ومثلا في الساعات الأخيرة حصلت شركة "مصدر" الإماراتية على قطع أرض في سوهاج بصعيد مصر لإنشاء مزرعة رياح باستثمارات 10 مليار دولار وهي المشروع الأضخم في تاريخ الصعيد.
المشروع اتكلمنا عليه قبل كده لما كان حلم على ورق لكن النهاردة دخلنا مرحلة التنفيذ... والمشروع عبارة عن مزرعة رياح "مصدر" بطاقة 10 جيجاوات توازي 5 أضعاف الطاقة الكهربائية المولدة من السد العالي بأسوان وبتعتبر تاني أكبر مزرعة رياح في العالم بعد مزرعة جانسوا بالصين واللي بتنتج 20 جيجاوات من الكهرباء النظيفة المتجددة.
مفيش شك طبعا مشروع بالصخامة دي ممكن يقلب الأمور ويغير وجه الصعيد كله بحجم الطاقة الكهربائية اللي هتطلع منه بخلاف مئات الآلاف من فرص العمل المباشر وغير المباشر لاهل الصعيد وغير المشروعات اللي هتقوم في الصعيد كله على حس الكهربا الجديدة اللي هناك وده غير طبعاً إن المشروع إضافة ضخمة وعظيمة لشبكة الكهرباء والقدرات المصرية في الطاقة بالمنطقة كلها وهيعزز تحويل مصر مصدر للطاقة وتصديرها كمان رغم أزمة تخفيف الأحمال اللي عندنا بسبب نقص الوقود لتشغيل المحطات الكهربائية الموجودة.
