مصر تجني ثمار بريكس.. مليار دولار عاجلة تنعش خزائن الحكومة
من حوالى 6 شهور تم الاعلان رسميا عن انضمام مصر الى تجمع بريكس اللى بيعتبر واحد من اهم التجمعات التجارية فى العالم لأن بيستحوذ تقريبا على أكتر من 30% من حجم التجارة العالمية بالاضافة الى انه بيضم دول كبيرة ليه ثقل عالمي زي روسيا والصين .. ومن وقت انضمام مصر لبريكس ولحد دلوقتى كل الناس بتسأل هو ايه اللى هتستفادوا مصر من التجمع ده؟ وايه الامتيازات اللى ممكن تاخدها؟
فى شهر اغسطس اللى فات وفى اجتماع شهير فى جنوب افريقيا قررت مجموعة "بريكس" زيادة عدد أعضائها عبر دعوة كل من مصر والسعودية والإمارات والأرجنتين وإيران وإثيوبيا إلى الانضمام تمهيدا لتحويلها إلى تكتل يسيطر على نحو ثلث الاقتصاد العالمي.
ومع التوسع ده اللى بيعتبر الأول من 2010 وهو تاريخ انضمام جنوب أفريقيا للمجموعة زاد عدد الدول في التحالف إلى 11 عضو بعدما كانت بتضم روسيا والبرازيل والهند والصين وجنوب أفريقيا بس لأكتر من 13 سنة.
النهاردة مصر هتبدأ جنى ثمار الانضمام لبريكس وأعلن وزير المالية محمد معيط انه من المرتقب حصول الحكومة المصرية على تمويل من بنك التنمية الجديد التابع لبريكس بقيمة مليار دولار في نهاية 2024 هيتم ضخها في مجالات البنية التحتية والتنمية البشرية.
معيط قال أنه في الوقت الحالي بتجري العديد من المفاوضات للحصول على تمويلات ميسرة للعديد من القطاعات المختلفة داخل الدولة.
ودي هتكون أول مرة تحصل مصر على تمويل من بنك التنمية بعد انضمامها ليه السنة اللى فاتت بقرار من الرئيس السيسي وميزة التمويلات المقدمة من البنك ده انها بتكون بفايدة منخفضة جدا وبشروط سهلة وميسرة فى السداد خصوصا للدول الاعضاء فى بريكس وتقدر تقول كده ان بريكس انشأت البنك ده مخصوص عشان يكون بديل لصندوق النقد الدولي اللى بيستغل الظروف الصعبة لبعض الدول وبيفرض شروط مجحفة للموافقة على اقراضها أى مبالغ
طب هل فيه استفادة تانية لمصر من الانضمام لبريكس؟
فيه فوايد تانية كتيرة زي مثلا اتفاقيات تبادل العملات المحلية اللى بتبرمها مصر مع دول التجمع والاتفاقيات دي بموجبها مصر هتستورد وتصدر اى حاجة وتسدد تمنها بالجنيه المصري او بعملة البلد اللى هتوقع معاها اتفاقيات وطبعا ده هيقلل فاتورة الاستيراد وهيخفف الضغط على الاحتياطي النقدي فى البنك المركزي
