صدمة في سوق السيارات.. الأسعار رايحة على فين وحكاية عودة الأوفر برايس

 
إيه اللي بيحصل في سوق السيارات وايه حكاية عودة الأوفر برايس على الأسعار وهل صحيح محدش هيقدر يشتري عربيات تاني.. تعالو نشوف إيه الحكاية وايه اللي بيحصل في السوق 
 
طبعا محدش يقدر ينكر أن أسعار السيارات نزلت بشكل كبير جدا مقارنة بأسعار الأزمة في 2023 ايام ماوصلت الأسعار لارقام خيالية وفرض تجار السيارات اوفر برايس كبير عشان يحموا نفسهم من تقلبات سعر الدولار وقتها وفي زمن السوق السودا واللي سيطرت بشكل كبير على السوق في الوقت ده بسبب المضاربات السريعة على أسعار العملة ونتيجة وقف الاستيراد في ذروة أزمة الدولار زاد ارتفاع أسعار السيارات وانخفض المعروض بشكل كبير وبقي فيه تراكم للطلب على السيارات ودي اللي عمل الأزمة وعشان كده سوق السيارات الوحيد اللي قلنا هياخد وقت لغاية ما يسترد عافيته ويكمل دورات الاستيراد ويلبي الطلب المتراكم على السيارات .

وبعد تحرير سعر الصرف والدولار بقي حر وانتهي زمن السوق السودا للدولار بدأ للسوق يستعيد قوته شوية بشوية وانخفضت أسعار كل الموديلات تقريبا ووصلت التخفيضات ما بين 300 إلى 750 ألف جنيه كل التوقعات قالت إن الأسعار هتستمر في النزول مع إستمرار الاستيراد وتلبية الطلب على السيارات وفعلا ده بيحصل وإجراءات الاستيراد لسه مستمرة وإن كانت مش بنفس القوة والمعدلات وده طبيعي لان السوق خارج من أزمة كبيرة
طيب ايه اللي بيحصل دلوقتي في السوق؟

شوف ياسيدي الشعبة العامة للسيارات، قالت إنها لاحظت عودة الأوفر برايس على بعض الطرازات الجديدة مرة تانية وده بيرجع إلى زيادة الطلب الكبير على سيارة بعينها في ظل عدم طرح عدد كافٍ لتغطية طلبات الشراء.. يعني ايه الكلام ده.. يعني حضرتك أسعار السيارات زي ما هي مستقرة وهتنزل لسه لكن فيه اوفربرايس رجع سيارات معينة حديثة عليها طلب كبير جدا وده تتسبب في ارتفاع سعرها من بين كل الانواع التانية ودي شيء طبيعي جدا في اي سوق لما يكون سلعة معينة عليها طلب زيادة ومفيش معروض منها كتير سعرها بيرفع مع نفسه.
وقالت الشعبة أن أسعار السيارات مستمرة في الانخفاض على مدار الشهرين اللي فاتوا لكن عودة الأوفر برايس على عدد من الطرازات الجديدة، رغم تراجع أسعار السيارات الجديدة خلال الفترة اللي فاتت.

طيب ايه هي العربيات اللي اتفرض عليها اوفر برايس ؟
أول سيارة رجع عليها الاوفر برايس هي شيري تيجو 4 برو اللي لسه مطروحة بالسوق المصري  من أسبوعين بس بالإضافة إلى تويوتا كورولا وكيا سبورتاج وقالت الشعب ان أسعار السيارات الجديدة المتدواله اليوم تعد أقل من سعر التكلفة وتسعيرها أقل من أسعار صرف الدولار بالبنوك وإن غالبية شركات السيارات بمصر يتقيم أسعار طرازاتها وفق لانخفاض العملة الأجنبية وتحديدا الدولار وإن كتير من التجار معندهمش مخزون للتسليم الفوري ومن لديه مخزون يسلم بسعر 47 أو 48 للدولار.

الشعبة كشفت حاجة تانية وقالت إن أبرز السيارات اللي دخلت خلال الشهور اللي فاتت باختلاف العلامات التجارية متوفرة وتباع بدون أوفر برايس، وده بسبب قلة الطلب عليها مقارنة بالطرازات اللي  عليها إقبال كبير من العملا والمشترين وإن السوق هيستقر بشكل كبير في الفترة الجاية بعد حالة التذبذب والاضطراب وده طبيعي جدا بعد الأزمة الأخيرة في سعر الدولار وتأثر الاستيراد.