الناس بتسأل.. هو البنك المركزي مايقدرش يوفر 300 مليون دولار لحل أزمة الكهربا
بعد إعلان البنك المركزي ارتفاع الاحتياطي النقدي لمستوى تاريخي بتخطيه حاجز الـ46 مليار دولار ناس كتير بتسأل هو المركزي يعني مايقدرش يوفر 300 مليون دولار في الشهر عشان يحل أزمة استراد الغاز ويحل أزمة انقطاع الكهربا حتي في فصول الصيف بس.. هنقولك ليه المركزي مايقدرش يعمل كده دلوقتي وهنقولك إمتي المركزي يوفر دولار لحل أزمة تخفيف الأحمال.. في التقرير التالي هنقولك على الحكاية كلها
في الأول بنفكركم بكلام الدكتور محمد معيط، وزير المالية لما قال إن قطاع الكهرباء بحاجة إلى 300 مليون دولار إضافية شهريا لمنع تخفيف أحمال الكهرباء ساعتين يوميا، لأن أسعار المواد البترولية لسه مرتفعة على المستوى الدولي، على خلفية ارتفاع أسعار البترول عالميا وتغير سعر الصرف، الأمر اللي بيأثر على الموازنة العامة للدولة.
تاني حاجة هنقولك عليها هي إن أهم سبب إن البنك المركزي مايقدرش دلوقتي يوفر 300 مليون دولار في الشهر عشان يحل أزمة الكهربا وهو إن المركزي ليه اولويات في استخدام الاحتياطي النقدي بتاعه ومايقدرش يتخطي الأولويات دي لأنها معمول حسابها كويس والدولة شايلة الاحتياطي ده لجاجات تانية مهمة.. يعني أهم من حل مشكلة الكهربا؟.. هنقول حضرتك أيوا أهم من مشكلة الكهربا.. وخلونا متفقين على حاجة تانية مهمة جدا وهي توفير دولارات لاستيراد الغاز مش من مسئولية البنك المركزي لكن دي مسولية مشتركة لوزارة الكهربا والبترول.
طيب ايه هي أولويات استخدام الاحتياطي النقدي ؟
شوف ياسيدي البنك المركزي عنده أولويات في استخدام احتياطي النقد الأجنبي أولها سداد خدمة الدين على الدولة المتمثلة في فوايد وأقساط قروض في مواعيد استحقاقها ودي بتاخد أولوية قصوى تجنبا لتعرض التنصنيف الائتماني للدولة للانخفاض.
ومن بين الأولويات قدام المركزي هي سداد المستحقات على مصر للشركات الأجنبية لضمان استمرار تعاون الشريك الأجنبي في التنقيب واستخراج الغاز، وكمان تمويل فاتورة استيراد القمح، والسلع الإستراتيجية زي السلع الغذائية اللي لا يمكن الاستغناء عنها بخلاف انقطاع الكهرباء التي يمكن تحملها بشكل مؤقت.
طيب المركزي بيدفع كام ديون؟
شوف حضرتك بحسب تقرير البنك المركزي حول الوضع الخارجي للاقتصاد المصري، زادت تقديرات مدفوعات الدين الخارجي على مصر (فوائد وأقساط الدين) بحوالي 2.44 مليار دولار خلال السنة الحالية 2024 والسنة الجاية لتصل إلى 56.74 مليار دولار، وفق تقرير الوضع الخارجي للاقتصاد المصري المنشور على موقعه الإلكتروني
طيب هل صندوق النقد الدولي ليه علاقة بطرق استخدام الاحتياطي؟
عشان نبقي عارفين المركزي ملتزم بالاستمرار في تغذية احتياطي النقد ولسه موصلش للمستوى المتفق عليه مع صندوق النقد بهدف حماية الاقتصاد من أي مخاطر محتملة، وده بيتطلب استمرار العمل على تغذيته بشكل قوي يعكس حجم الالتزامات الخارجية على مصر وزي ما احنا عارفين كمان إن الاحتياطي فيه ودايع لدول عربية بـ 19 مليار دولاروعشان كده المركزي حريص على الحفاظ على كل دولار عنده وكمان قيمة الاحتياطي الحالي بتكفي ل 8 شهور وده مناسب جدا بالنسبة للظروف اللي بيمر بيها العالم من حولينا واللي بيحصل في الأسواق الدولية والاحتياطي الحالي عامل أمان ضد أي كوارث عالمية تانية وعشان كده مش هينفع المركزي يهدره.
طيب امتى المركزي يسدد فاتور الغاز؟
منطقيا بعد انتهاء البنك المركزي من سداد كل الالتزامات اللي عليه من قروض وأقساط وخلافه ودخول تدفقات نقد أجنبية جديدة ممكن يبدأ المركزي في استيراد الغاز لمحطات الكهرباء.
