لغز الدولار.. إزاي الاحتياطي بيزيد وفيه أزمات في الدواء والكهربا والبنزين والسولار

هو إيه اللي بيحصل في الأيام دي وإزاي فيه أزمة دواء وكهربا وبنزين بسبب ارتفاع الدولار وفي نفس الوقت مفيش مشكلة ف المعروض والاحتياطي كمان بيزيد.. تعالو نعرف ايه التفاصيل في الفيديو ده

كلنا عايشين أزمات ارتفاع أسعار الأدوية ولسه الكهرباء والبنزين والعيش وانقطاع التيار وكلنا عارفين سبب الأزمات في كل حاجة من دول وإن مثلا أزمة تخفيف الأحمال سببها ارتفاع اسعار السولار والمازوت والمواد البترولية المستخدمة ف تشغيل المحطات بسبب الزيادة الكبيرة في الاستهلاك وارتفاع درجة الحرارة بشكل غير مسبوق والدولة بتوفر مبلغ كبير كل شهر من سياسة تخفيف الأحمال لغاية ما الأزمة تعدي ونفس الموضوع في الدوا لأن شركات الانتاج بتشكي من ارتفاع اسعار المادة الخام المستوردة من الخارج وبالدولار ونفس القصة في البنزين والمواد البترولية واللي متوقع سعرهم يزيد بسبب ارتفاع الاسعار عالميا.
طيب هي الدولة مش حلت أزمة نقص الدولار يبقي المشكلة فين؟
من ساعة التعويم واختفاء السوق السودا وترك اسعار الصرف لقانون العرض والطلب ومفيش مشكلة في توافر الدولار لكن السبب مش في الدولار نفسه لكن الأزمة في ارتفاع اسعار المواد الخام والبترول عالميا وده اللي سبب ضغوط مضاعفة على الدولار ولولا قرار تحرير سعر الصرف واللي سمح بتدفق الدولار وصفقة راس الحكمة وعودة الاستثمارات المباشرة وتحويلات المصريين بالخارج كان زمان البلد في حتة صعبة جدا.
طيب المشكلة فين.؟
لازم تعرف ياعزيزي إن الأزمة مش في مصر لكن في اللي بيحصل حولينا وشوف ازاي البلد استضافت  15 مليون لاجيء بياكلو ويشربوا ويستهلكو ادوية وكهرباء وازاي مثلو عامل ضغط رهيب على موارد الدولة وفي نفس الوقت مصر فقدت 40% من دخل قناة السويس في وقت صعب يعني بنتكلم في حوالي 4 مليار دولار.
وده غير ارتفاع الاسعار عالميا بشكل غير مسبوق بسبب الأزمات الدولية في المنطقة وفي روسيا وحط عليهم كمان التغير المناخي واللي مصر بدأت تعاني منه في الحر الشديد واللي سبب ضغط على موارد الدولة بردو... واللي عاوزين نقوله إن مصر في دايرة كلها فوضى حولينا والظروف أكبر منها وياتعدي بأمان ياإما لاقدر الله هتكون مشكلة كبيرة.

طيب ازاي الاحتياطي بيزيد وسط الأزمة؟
في الأول لازم نعرف إن الدولة ليها أولويات في الانفاق وأول حاجة هي الاحتياطي النقدي في البنك المركزي واللي هو صمام الأمان للشعب كله لأنه هو اللي بيغطي الواردات من السلع الأساسية والمستوردة اللي الناس متقدرش تستغني عنها والحقيقة البنك المركزي عامل اعجاز في قصة توفير الدولار والاحتياطي تحديدا لأنه هو الأمان بالنسبة للبلد وسط كل الازمات اللي بنعيشها واللي حولينا من كل حتة.