قبل ما تفكر تسرق كهربا.. شوف العقوبات لو عملت توصيلة مخالفة

 
في الفترة اللي فاتت في ناس كتير جدا اتجهت لسرقة الكهرباء من ورا العدادات خصوصا مع دخول فصل الصيف لتشغيل التكييفات والمراوح ووسائل التبريد المختلفة.. يا تري الدولة بتعمل اية علشان تواجه سرقة الكهرباء وايه هي عقوبة سرقة التيار ..
 
أزمة تخفيف الأحمال الموجودة علي الشبكة القومية للكهرباء واللي كل الدولة بتعاني مها بسبب قطع الكهرباء علي كل محافظات الجمهورية لمدة ساعتين في الفترة من 3 الي 7 مساءا يوميا، السبب الأساسي فيها هو موضوع سرقة التيار الكهربائي.
طيب الدولة عرفت ازاي أنه في سرقة تيار كهربائي ؟.
في الفترة الأخيرة وزارة الكهرباء اكتشفت أن نسبة التحصيل اللي بتلمها الدولة من المواطنين اقل بكتير من بكتير من كمية الكهرباء اللي الدولة بتنتجها وده يعني أن في نسبة فقد كبيرة جدا علي الشبكة، ومن هنا بدأت الوزارة في تركيب عدادات في المحولات في الأحياء والمناطق السكنية علشان تقيس نسبة الكهرباء اللي بتدخل المحول ونسبة الكهرباء اللي المواطنين بيدفعوا لها فلوس وبالتالي كده الوزارة هتعرف نسب الفقد اد أية علي المحولات والمناطق اللي موجود فيها نسب فقد اعلي هيكون سهل تحديدها وبعدين عناصر شرطة الكهرباء هتنزل تشوف شغلها وتضبط عمليات سرقة التيار .
مش كده بس، في حاجة مهمة قوي في موضوع مواجهة سرقة التيار في العدادات خصوصا الناس اللى ركبت عدادات مسبوقة الدفع أو العدادات ابو كارت، وفي ناس بعد ما ركبت العدادات دي عملت توصيلة بعيدة عن العدادات علشان توصل كهرباء بطريقة غير شرعية، دلوقتي مباحث الكهرباء معاهم جهاز اول ما يحطه بالقرب من بيجيب كل بياناتك سواء كنت رسمي أو سارق تيار أو حتي اليم مخالفة، أو عامل توصيلة من وراء العداد وكله بيظهر، وهتكون قاعد في بيتك في امان الله وتلاقي بتوع مباحث الكهرباء واقفين فوق دماغك وبيعملوا كشف علي العداد علشان يشوفوا لو كنت سارق كهرباء، وخلي بالك العقوبات في الموضوع ده بقت مغلظه جدا وممكن توصل للحبس .

طيب اية اللي بيحصل في وزارة الكهرباء والطاقة المتجددة علشان يقللوا من سرقة الكهرباء ؟.
وزير الكهرباء والطاقة المتجددة الدكتور محمد شاكر عمل اجتماع مع قيادات الوزارة ورؤساء شركات التوزيع علي مستوي الجمهورية علشان يطالبهم بحصر وتقليل وقائع سرقة التيار، خصوصا شركة توزيع كهرباء جنوب القاهرة واللي الحصر اللي عملته الوزارة جت علي رأس قائمة اعلي الشركات في موضوع سرقة التيار، وبعدها جت باقي الشركات تباعاً..
طيب اية هيا عقوبة سرقة التيار الكهربائي ؟.

القانون حدد عقوبة الحبس لاي حد بيسرق كهرباء بمدة متقلش عن 6 أشهر وغرامة لا تقل عن 10 آلاف جنيه ومتزدتش عن 100 ألف جنيه او بواحدة من  العقوبتين دول، ده غير أن حضرتك لو اتمسكت متلبس في موضوع سرقة الكهرباء ده هتكون مطالب بدفع قيمة التيار الكهربائي اللي سرقته ده غير دفع ما يساوى ضعف قيمة  التيار المسروق كغرامة عن مدة 12 شهرا كحد أقصى، وفى حالة  تكرار السرقة هتكون العقوبة الحبس مدة لا تقل عن سنة وبغرامة متقلش عن 20 ألف جنيه ولا متزدش على 200 ألف جنيه أو بواحدة من العقوبتين، فى كل الأحوال المحكمة هتحكم بإلزام المحكوم عليه برد ضعف قيمة استهلاك التيار الكهربائي المسروق .