اللي جاي صعب.. ليه تحفظ فلوسك في الدهب قبل فوات الاوان
ايه اللي هيحصل في الأيام الجاية وليه الدهب هو فرصتك الأخيرة عشان تحفظ فلوسك وتعمل حسابات الليالي الصعبة اللي جاية وليه أفضل وقت تشتري فيه النهاردة.. تعالي نشوف اللي بيحصل
في أوقات الأزمات الاقتصادية وانت مغمض بتروح تشتري دهب سبايك أو مشغولات وتشيلها للزمن لأن الدهب معدن اصيل مش بيخسر وبالعكس قيمته بتزيد مع الأيام وده سبب الإقبال الكبير عليه عالمياً لما بتحصل صراعات أو أزمات اقتصادية كبيرة في العالم لأنه وعاء تحوط أو بالبلدي كده طريقة أمان تحافظ بيها على فلوسك.
ولو ملاحظين اللي بيحصل في الصاغة هنلاقي فيه حالة توتر وتقلبات في الأسعار شوية تحت وشويتين فوق وكل التوقعات اللي قلناها في بانكير بتقول الدهب في الطالع وهيوصل مستويات قياسية بسبب اللي بيحصل في العالم حولينا وأن مصر مش هتكون بعيد عن اللي بيحصل واكيد هتتأثر بأسعار الدهب عالميا بسبب الدولار وخاصة مع اقتراب صدور قرار بنك الاحتياطي الفيدرالي الأمريكي حولين سعر الفايدة على الدولار واحتمال يخفضها وده معناه ارتفاع كبير وتلقائي في سعر الدهب بسبب الإقبال الكبير المتوقع عليه مع صدور قرارات الفدرالي الأمريكي وزيادة سحب البنوك المركزية العالمية المعدن الأصفر لتعويض خسايرها من انخفاض قيمة الدولار في احتياطياتها.
طيب خلونا في مصر ايه اللي هيحصل في الصاغة.. الفترة الجاية متوقع يكون فيها قرارات اقتصادية صعبة بدأت بزيادة سعر الخبز المدعم وهتوصل لزيادة أسعار شرائح الكهربا وكمان احتمال أسعار البنزين والسولار والبوتجاز تزيد في اجتماع لجنة التسعير الجاية ولأن ده معناه زيادة متوقعة في أسعار حاجات كتير اللي بتعتمد على النقل بسبب زيادة التكلفة المتوقعة فأكيد كل اللي معاه قرش زيادة هيدخره للزمن أو يحاول يستفاد منه بالحصول على إيراد شهري يساعده على المعيشة أو يشيله على جمب وفي نفس الوقت قيمته بتزيد وهنا الحل الامثل هو الاستثمار في الدهب لأنه اكتر استثمار هيكون فيه مكسب وفي نفس الوقت يحافظ على فلوسك في الأزمات اللي احنا فيها.
طيب يعني مفيش استثمارات تانية غير الدهب أحد فيها فلوسي.. طبعا فيه حاجات تانيه كتير زي شهادات الادخار في البنوك وزي الاستثمارات في العقارات وتشغيل الفلوس في مشروعات خاصة أو في البورصة لكن الدهب ميزته إنه أمان وتحت ايدك ممكن في أي لو اتزنقت تبيعه ومش بياخد وقت ولا إجراءات زي انواع الاستثمارات التانية .
