هتاخد مليون جنيه وبفوايد على قد الإيد ومن غير مستندات كتير

 
 
عاوز  تمويل بس خايف من الفايدة وشروط البنوك ومحتار تروح فين.. هنقولك على الحل وازاي تاخد مليون جنيه مرة واحدة بشروط بسيطة وفايدة على قد الإيد..إقرا التقرير ده وانت تعرف التفاصيل 
 

شوف بقي ياسيدي بنك ناصر الاجتماعي برئاسة الدكتورة نيفين القباج وزيرة التضامن الاجتماعي ورئيس مجلس إدارة بنك ناصر التمويلات الشخصية بيتيح لموظفي شركات القطاع الخاص وموظفي البنوك التانية  قروض بشروط ميسرة جدا  ومستدات بسيطة.
وكل المطلوب منك هو صورة بطاقة الرقم القومي وإيصال مرافق حديث، وكمان خطاب معتمد من جهة العمل موضح فيه قيمة الدخل الشهري و كمان تعهد جهة العمل بتحويل قيمة الراتب أو القسط الشهري وخلاص على كده مش عاوزين مستندات تانية ولاضامن ولا غيره.

وبخصوص باقي التفاصيل فمدة تسديد القرض  أو التمويلات النقدية بتبدأ من سنة وبتوصل إلي 7 سنين بشرط تحويل الراتب أو القسط الشهري علي البنك أو السداد النقدي لموظفي البنوك الأخرى وألا يقل سن العميل عن 21 سنة ولا يتجاوز 60 عاما عند نهاية مدة التمويل، ويكون الحد الأدنى للراتب الشهري 2500 جنيه، والحد الأقصى للتمويل مليون جنيه.
وزي ما احنا عارفين بنك ناصر ليه وضع خاص ومهمته الأساسية مساعدة الناس والفئات غير القادرة أنها تبدأ حياة جديدة عشان كده هو بنك تبع وزارة التضامن لكن بيقدم خدمات قروض وتمويل معينة بفائدة أقل ما يمكن وبتيسرات كبيرة جدا واهم قروض بيقدمها هي قروض المشروعات اللي بتساعد في تحسين الدخل للأسر المصرية وساعد ناس كتير تبدأ حياتها.
ومن بين التمويلات الاجتماعية اللي بيقدمها بنك ناصر هي قروض لأصحاب المرتبات و المعاشات بدون عائد و بمصاريف إدارية بسيطة و سداد على 3 سنين و ييتم إعفاء أسرة المقترض من سداد باقي الأقساط في حالة الوفاة. .
كمان البنك بيمول  المتعافين من الإدمان  وده غير تمويل مشروعات الحضانات وتمويل المصروفات المدرسية.. يعني لو بصيت في كل القروض هتلاقي البنك مش بيهدف للربح قد ما هدفه يساعد فئات كتير في مصر.

بنك ناصر بيقدم كمان قروض. خاصة بالزواج من خلال تقديم اصل وثيقه عقد قران بالنسبه للمسلمين أو محضر الخطبه للطوائف المسيحيه بشرط الا تزيد مدته عن 7 سنين ويقوم عقد الزواج مقام محضر الخطبه  بالنسبه للطوائف المسيحيه في الأحوال التي لا يتم فيها تحرير محضر الخطبه 
وكمان بيقدملك قرض العلاج وكل اللي عليك أنك تقدم  شهاده طبيه حديثه معتمده من احد المستشفيات التابعه لوزاره الصحة.. وبالنسبة لقرض أعباء بدء العام الدراسي والجامعي فهتقدم صورة قيد من الجهه التابع لها ( المدرسه / الجامعه ) وهتصرف القرض من بنك ناصر.
كمان البنك بيقدم قرض تجهيز واعداد الرسائل العلمية ومشروعات التخرج للطلبة بناء على خطاب من الجامعه يفيد بعمل مشروع تخرج او عمل رساله علمية وفيه كمان عندهم قرض الحالات الملحة أو الطوارئ وكل اللي هتعمله انك هتقدم المستند الدال علي الحالة اللي عندك وبسببها عاوز قرض.