سر تحركات مدبولي الأخيرة.. إيه اللي حصل في النوبارية
![الدكتور مصطفى مدبولي]( /UploadCache/libfiles/5/5/600x338o/209.jpg)
هو رئيس الحكومة راح ليه النوبارية النهاردة وإيه اللي قاله هناك وإيه سر الزيارات الكتير من رئيس الوزراء لمواقع الإنتاج والتصنيع.. خليكم معانا هنشوف مفاجآت
لوعترف إن الشهور اللي فاتت كانت صعبة جدا على الناس وعلى البلد في نفس الوقت وده شيء خارج عن الإرادة وكلها أزمات مستوردة من بره وجت لغاية عندنا لأننا في النهاية احنا جزء من العالم.. لكن الأزمات كانت السبب إن الدولة تعدل خطط التنمية عندها وتعدل الأولويات الاقتصادية ودي كانت اكبر فايدة حصلت لمصر على مدار تاريخها والنهاردة لأول مرة البلد كلها بتتكلم في تصنيع وزراعة وتعدين وتصدير بالمليارات وإن لازم أزمة الدولار ما تتكررش تاني.
اللي بيعمله الدكتور مصطفي مدبولي اليومين دول واللي عمله على مدار الشهور اللي فاتت بيقول إنه راجل مش بينام رغم حالة الغلاء وصعوبة المعيشة لكنه شغال على كل الاتجاهات ومحدش يقدر ينكر جهود حكومته وإن الأمور مخرجتش عن السيطرة رغم الصعوبات.. ليه مدبولي كان في النوبارية النهاردة .. ممكن حضرتك تفتكرها زيارة عادية لافتتاح مصانع وتوسعات لكن الحقيقة الهدف أكبر من كده بكتير وهي إن مدبولي عاوز يوصل رسالة للمصريين وهي رسالة مهمة جدا إننا نقدر ننتج ونصنع ونصدر ولو ملاحظين هنعرف إن رئيس الحكومة في كل زياراته الأخيرة للمصانع بيتكلم في أرقام وصادرات وإننا نقدر نوصل لـ145 مليار دولار صادرات غذائية ونقدر نوصل ل100 مليار في قطاعات تانية وهو ده المطلوب دلوقتي إن الناس تصدق إن عندنا مصانع ومناطق صناعية ضخمة تقدر تنفذ دا وإن الحكومة مش بتتكلم وخلاص ولا بتقول كلام في الهوا.
تصريحات مدبولي وزياراته جت في وقتها عشان في موجة تسويد الواقع ونشر حالة من الإحباط واليأس وتصدير التشاؤم والأخبار المفبركة أو نشر نص الحقيقة ومع اللي بيحصل حولينا والتشكيك الكبير من منصات معادية كان لازم الحكومة تفوق الناس وتقولهم إننا نقدر وهنقدر وعندنا خطط وأرقام بتتنفذ رغم إن الحكومة والدولة ماشية على شوك وبتحاول تمشي في كل الاتجاهات من غير الدولة ماتوقع في الفوضى اللي حولينا.
النهاردة مدبولي افتتح توسعات جديدة شفناها بعنينا واتكلم في مليارات صادرات بتزيد كل يوم وبنشوفها بردو في البيانات الرسمية والأهم إن مدبولي أتكلم عن المستقبل واللي الدولة ناوية عليه في كل القطاعات من الإسكندرية لأسوان.
كمان جولة مدبولي النهاردة في الإسكندرية والبحيرة وقبلها في العاشر من رمضان بتأكد كمان الكلام اللي قلناه في بانكير قبل كده إن مستمر في الوزارة ودا بسبب ثقة الرئيس فيه وفي نفس الوقت إنه مسئول كلامه قليل وفعله كتير وردوده كلها بالأرقام وشخصية متزنة.