إيه اللي بيحصل في حقل ظهر.. تفاصيل مؤامرة أهل الشر

 
 
ايه حقيقة اللي بيتقال عن حقل ظهر للغاز الطبيعي وايه حكاية سفينة التنقيب اللي انسحبت من تطوير الحقل وهل صحيح الشركات الأجنبية وقفت شغلها لغاية ما تاخد بقية مستحقاتها وايه اللي قاله أهل الشر.. تعالوا نشوف إيه الحكاية بالظبط في الفيديو ده .

 
معروف إن حقل ظهر للغاز الطبيعي في مصر من أكبر حقول الغاز في المنطقة ومصر ليها 7 سنين بتسحب منه وبتصدر لكن حصل انخفاض طبيعي في احتياطيات الحقل وده بيحصل في كل حقول الغاز والبترول في العالم كله  ومش اختراع مصري لكن أهل الشر ماصدقوا يلاقوا حاجة يشككوا فيها وينشروا الإشاعات والأكاذيب علشان يستغلوا الحالة .. طيب الدولة قالت إيه..
تعالوا نشوف أهل الشر قالوا ايه.. في اليومين اللي فاتوا منصات السوشيال ميديا إياها طلعت وقالت إن سفينة تنقيب ايطالية تابعة لشركة ايني انسحبت من موقع حقل ظهر ووقفت شغل في التنقيب عن الغاز في منطقة امتياز الحقل بسبب مستحقاتها المتأخرة وده الكلام اللي طلعت وزارة البترول وردت عليه بالتفصيل وقال المتحدث باسم وزارة البترول، إن عمليات التطوير في حقل ظهر لم تتوقف وجاري حاليًا تكثيف عمليات التنمية ورفع كفاءة التشغيل، وقال ان الحقل شغال من سنة 2017 وبينتج 2 مليار قدم مكعب من الغاز يوميًا.
وأكد المتحدث باسم وزارة البترول في تصريحات أنه لا صحة لما يتردد بخصوص انسحاب سفينة حفر عملاقة من حق ظهر، موضحًا أن السفينة التي أثير حولها الجدل لا علاقة لها بحقل ظهر وتعمل في موقع آخر يعني كتائب أهل الشر مش عارفين يكدبوا واخترعوا قصة من العدم .
متحدث البرول قال كمان إن الشركات العالمية العاملة في التنقيب في حقل ظهر شغالة بشكل طبيعي، وإن مصر ملتزمة بسداد كل المستحقات الخاصة بشركات التنقيب عن البترول، والشركات العالمية عارفة إن مصر ملتزمة باتفاقياتها وتعهداتها وشددت جزء كبير منها كمان وكان آخره سداد ا 20% من قيمة مستحقات الشركات العالمية واللي مصر بتشتري حصتها من الإنتاج وتضخه في السوق المحلي والشركات دي ليها سنين شغالة في مصر ومش هتوقف شغلها عشان صرف جزء من المستحقات أتأخر شوية وكده بيحصل معاها في أي دولة.
وزي ما احنا عارفين إن مصر وقفت تصدير الغاز منذ 2019 خلال الصيف من أجل الاستخدام المحلي، وفي خلال العام الحالي توقف التصدير منذ مايو الجاري، ولا تخرج سوى شحنات الشريك الأجنبي.
كمان مصر يتسابق الزمن عشان تكتشف حقول جديده من الغاز وظهرت البشاير في حقلين بمنطقة أبو قير باحتياطيات تفوق التوقعات حسب بيان الشركة والكلام ده قلناه بالتفصيل امبارح في بانكير وقلنا إن منطقة أبو قير منطقة واعدة بالغاز بعد الاكتشافات الأخيرة واللي هتدخل حيز الإنتاج خلال شهور معدودة ومصر فيها مناطق تنقيب كتيرة الشركات شغالة فيها سواء في البحر أو الصحراء والدلتا ومتوقع يكون فيه اكتشافات جديدة ترجع مصر تاني مركز إقليمي لإنتاج وتصدير الغاز الطبيعي.