السيسي مبيهزرش.. إيه اللي هيحصل في ملف الكهربا بعد تصريحات الرئيس

امبارح الرئيس عبدالفتاح السيسي اتكلم وطالب الحكومة بتوضيح الأمور للناس بصراحة، وقالهم بشكل أنه عايز الناس تفهم اية المشاكل اللي عندنا، وخصوصا في موضوع تخفيف الأحمال.. يا تري اية حكاية تخفيف الأحمال واية اللي هيحصل في الايام الجاية 

موضوع تخفيف الأحمال واحد من اهم الموضوعات اللي شغالة بال الحكومة واللي لحد اللحظة دي الدولة مش عارفة تحله ولسه مكمل معانا لحد شهر يوليو اللي جاي خصوصا بعد اعلان وزارة الكهرباء تعديل خطة تخفيف الأحمال علشان تبدأ من الساعة 3 الي الساعة 7 مساءا يوميا خلال الفترة من مايو حتي يوليو اللي جاي.
امبارح السيد الرئيس عبدالفتاح السيسي خلال افتتاح مشروعات تنموية في جنوب الوادي وشعور عدد من المواطنين بالانزعاج، في ظل الموجات شديدة الحرارة التي يتعرض لها طقس البلاد.
الرئيس اتكلم وقال إحنا بنحاول مأذيش المواطن الغلبان ولا نمس ظروفه ونساعده، يعني لو الرغيف بـ4 جنيهات فيه ناس ممكن تقدر تشتري بالسعر ده بس مش كل الناس تقدر تشتريه وإحنا متفهمين حاجة زي كده، ولكن في نهاية الأمر الدولة لها موازنة وطاقة مالية متقدرش تتحمل فوق حملها.
الرئيس قال كمان أن المواطن لو تم حسابه بالسعر الحقيقي للكهرباء، تمنها هيزيد أو يتضاعف مرتين، طيب الغلبان يروح فين؟ اقطع الكهربا ولا أغليها؟ وأغليها قد ايه؟ اللي بيدفع جنيه هيدفع 2 أو 3 جنية، لو مواطن بيدفع فاتورة 100 جنيه في الشهر هيدفع 300 جنيه طيب بنعمل إيه، بنشرحها، وأنا بتحمل المسئولية أمام الله، وقدامك علشان الكهربا تشتغل 24 ساعة بدون قطع، لازم أخلى تمنها مرتين تلاتة من سعرها دلوقتي، أنا عندي مشكلة أجيب البترول بالتمن ده، لازم الناس تعرف الحقيقة، أنا بكلمكم بمنتهى الصراحة، بقولكم الكهرباء ممكن تشتغل 24 ساعة بس بكام؟".
الدكتور محمد معيط وزير المالية طلع واتكلم كمان عن موضوع تخفيف الأحمال،
وقال إن ارتفاع أسعار البترول عالميًا مع تغيير سعر الصرف ودخول شهور الصيف ادي لاستمرار لتخفيف الأحمال، وان الدولة بتدفع 225 مليار جنيه دعم للمواد البترولية سنويا في وقت قطاع الكهرباء بيحقق عجزًا بقيمة 130 مليار جنيه.

وزير المالية اتكلم كمان وقال أن فيه شقين في أزمة تخفيف الأحمال أولهم بيتعلق بالتكلفة في وزارة الكهرباء، واللي عندها عجز 130 مليار جنيه كفرق تكلفة بين التكاليف والتحصيل وبالتالي المبلغ ده الدولة بتدفعه من الخزانة العامة للدولة، والشق الثاني بيتعلق بقطاع البترول خصوصا ان مصر بتستورد الغاز للكهرباء بسعر 3 دولار والخزانة العامة للدولة بتتحمل فروق أسعار أعلى من كده.
المهندس طارق الملا وزير البترول والثروة المعدنية، اتكلم وقال أن الأنتاج بتاعنا المحلي بيكفي الثلثين ونستورد الثلث الأخير من برا، وبنحتاج ما يقرب من 55 مليار دولار من الوقود بكافة أشكاله بوتاجاز وبنزين وسولار ومازوت في وقت بننتج منهم من 20 إلى 22%، ونستورد شهريًا ما يعادل بمليار و100 مليون دولار.
وزير البترول اتكلم كمان وقال أن منظومة الكهرباء كبيرة وتحتاج كميات كبيرة من الوقود، وبتستهلك وحدها 60% من الغاز المصري .